香港遊2015 — 澳門兩日遊

好彩阿姐食咗藥，瞓咗一晚，好番好多，我哋出發去上環信德碼頭集合，我哋一行十人澳門行，但芬契媽要放咗工至自己過大海

先係碼頭食個早餐，見阿姐有番胃口食嘢，就知佢己經好番好多

一過到澳門，求其搵架唔係去氹仔o既賭塲巴士，去近營地街市市政綜合大樓頂樓熟食檔食啲嘢

之後就行去酒店攞房

途中經過“禮記雪糕”，入去試吓佢啲雪糕磚同紅豆雪條先

攞咗房，係度等芬契媽o黎，抖一陣就出發去食飯，芬契媽成日同啲friend o黎澳門食好嘢，所以食咩都係佢發辦

佢話呢間“翅翅好”正喎，佢真係無介紹錯，好味

食飽行去賭場碰吓運氣，每次同阿姐返香港，都會去澳門行一轉，因為阿姐好鍾意去澳門，尤其今次佢好雀躍，因為佢終於夠年齡可以入賭場見識吓

我哋去咗十六浦，阿姨仲俾賭本阿姐賭，因為Pat契媽個女(我契女)未夠秤唔入得，要係外面等我哋，所以只係玩咗一陣，最後得阿姨贏錢，阿姐玩咗兩舖，無輸贏，我就從來都唔賭錢的，志在去睇吓o既唧

之後行去買宵夜、零食、生果返酒店食，遇到貓狗呢

第二朝，因為各人都唔同時間起床，早醒的就自己先去食早餐，遲起身的就索性直接去食lunch

Book咗位去“船屋”食葡國菜，又係芬契媽介紹，又係不錯的介紹

個Sangria幾好飲

呢間餐廳就係媽閣廟附近，所以就過去行吓

太熱頂唔順，坐巴士去買“瑪嘉烈”葡撻食

其實尋日已經去食，去到啱啱買晒閂咗門，今日終於食到

之後就去大山巴附近嗰條手信街，齊齊買手信

買完手信，搵到架賭場巴士去碼頭，但仲未夠鐘搭船返香港，三家姐提議去水立方再賭過

阿姐實跟埋去啦，但我同其他兩個契媽、契女、姨甥女唔賭的，就去碼頭飲杯嘢嘆吓冷氣，終於等到佢哋返黎，但佢哋全軍覆沒

坐船了走了

返到上環，我哋去“泉章居”食埋晚飯先，阿姨話呢餐當同我餞行，因為我仲有三日就走了