三樓執到貓

話說今日仔仔爸攞衫去洗時，係三樓見到一對男女陪住一隻虎紋貓，咁佢就問對男女係咪佢哋o既貓，對男女就say no，咁就繼續問佢哋點處置隻貓，佢哋又係say no，咁仔仔爸就二話不說就抱咗佢返屋企，仔仔爸話佢好乖，無掙扎，粒聲都無出

後來仔仔爸楂車o黎接我收工，返屋企車程中，仔仔爸都無同我講過隻貓o既事

當我返到屋企，走入厠所見到浴缸放咗個貓籠，仔仔爸至話我知佢抱咗隻貓返屋企，佢話佢真係好乖，個籠都未set 好，佢已經自己走入個籠入面，之後仔仔爸就出門去洗衫，再攞車o黎接我收工

我第一眼見就係佢對眼好大

之後就即刻幫佢沖涼

抺身時都好乖

唔知點解佢呢度無咗一大執毛

吹毛時都好乖

之後帶佢返房

好乖，唔怕人，好溫純

比嘢佢食，佢應該好肚餓，不停咁食，食得好急

後來仔仔爸抱咗Marble仔入o黎見貓貓，其實Marble仔驚咗佢

之後比佢自己休息吓，再之後仔仔爸幫佢剪指甲

唔鍾意，掙扎又兇人

我沖完涼就入房陪佢

後來我返房出post 上facebook，問吓啲貓友佢係仔定女，因為我唔想好似上次執Marble仔咁擺烏龍當咗佢係女

後來貓友全部都話係女仔o黎

Marble仔就入房陪我，個樣好無心機呢，怕多隻貓爭寵嗎，哈哈

慢慢佢仲瞓著咗
 

我哋食飯前，仔仔爸入房睇佢，佢都一直匿係床底唔出o黎，佢係嬲咗仔仔爸幫佢剪指甲，但我入房佢又會走出o黎

食完飯，天師仔跟仔仔爸入房見貓貓，三貓最想八貓貓就係天師仔，之前已經係房門口等貓，佢入到房想嗅貓貓，但貓貓驚驚，仲兇天師仔

後來仔仔爸請佢食潔齒餅，佢至肯出o黎，又係為食貓一隻 

睇佢咁溫純，年紀都應該好細，應該係有人養開，暫時唔同佢改名住，驚佢係走失貓，睇吓有無人貼紙話走失咗貓先

但見佢都偏瘦，面尖尖，似“儍豹”，見佢咁瘦，佢個主人都唔慌對佢好啦

下個星期就係勞工節，勞工節前係貓地遺失高峰期嗎，因為兩年前，又係喺勞工節前執到Marble 仔的