預祝生日飯

我今年生日係星期一，所以阿姐同男友仔就weekend 返嚟，早啲同我慶祝，平時阿姐多數星期五一放工就返嚟，但今次佢話唔想咁趕，話星期六瞓醒至返，咁我就約佢哋去St. Mark 食個 lunch

又係去嗰間食泰國餐，因為嗰度嘅Lunch set 好抵食

食完lunch 就返屋企，Chewy 當時係我張床上，佢都肯比佢阿娘摸，但都有啲想走，之後阿姐上網幫我搞啲嘢，奇哥要坐阿姐大髀呢，阿姐話奇哥仔真係好乖，話佢兩個女都唔會坐大髀

而Marble 仔就走去黐住男友仔

我哋餵好晒班貓地就出發去食飯，原本話去食法國餐，但間餐廳好細間，一定要訂位至有得食，因為我哋無訂位，所以我哋去度無得食，最後去咗St. Mark 食日本嘢

最主要就想試呢度嘅窩

呢餐一啲都唔貴，都食到好飽

返到屋企，諗住朝早我同仔仔爸一定會比較早起身，唔想嘈到阿姐佢哋瞓覺，所以今次我哋讓咗我哋間房張大床比阿姐同男友仔，我同仔仔爸就瞓廳 

一推張床褥出去，奇哥仔就霸實

Marble 仔一見阿姐上咗床，又去黐實

天師仔唔抵得又黐埋一份

奇哥仔又嚟八卦

最後奇哥仔又走埋上床，瞓番佢自己個位

男友仔入房見到，應該都覺得自己無位瞓😆😆😆

最後男友仔唔介意同奇哥仔陪佢瞓，Marble 仔就去廳同我哋瞓

第二朝，我哋收好張床褥，出門口去飲茶前，又見到Marble 仔返番入房瞓
 

男友仔真係好鍾意飲茶食點心，佢仲鍾意食煎堆，仲有食咗蝦腸同义燒包

飲完茶，阿姐話去唐人超市買零食，買完男友仔又話要食雪糕，最後去咗食冰

廿四孝老豆仔仔爸，就幫個女買定啲糧餉比阿姐返屋企慢慢食，有糉、有臘腸，都係男友仔鍾意食的

買齊嘢，我哋都叫阿姐早啲返屋企，我驚佢餓親我嗰兩粒孫女呢

臨走前，阿姐去黐吓個女，Chewy 一比佢阿姐黐完就走

尋日我正日生日，仔仔爸買咗兩隻龍蝦返嚟，泡制蒜蓉焗龍蝦

隻為食Charco 仔嗅到龍蝦味，就唔肯走，原本仔仔爸話唔比佢食，因為有調味，但最後都係佢話比啲龍蝦鉗肉，沖沖水比佢食，真係慈父多敗兒

為咗食肯比手

阿仔你仲未食夠嗎﹖

今年我生日，阿姐買咗個名牌手袋比我，嘩，好靚，我都有啲唔捨得用