膽小貓屁屁

我之前嗰份工有個同事叫Amy，後來佢離咗職，Amy 都係一個好鍾意貓嘅人，嗰陣我哋成日都講貓經，佢話佢小時候曾經養過貓，隻貓都好黐佢，但隻貓後來失咗蹤，到長大嚟咗美國，Amy 媽媽比較愛乾淨，所以唔准屋企養貓

好彩佢依家個男朋友都係愛貓之人，佢男友仔屋企附近都有好多流浪貓，佢哋都會成日去餵嗰啲流浪貓，Amy 一直都好想養一隻貓仔，終於係半年前就係佢男友仔屋企附近，用食物引誘咗隻為食小貓，拐帶咗佢返屋企，大約2、3個月大

佢叫屁屁，因為佢成日放屁，哈哈，佢有個心型鼻，好cute 好靚仔

依家大約8、9 個月大，有8 磅重

話說佢哋帶屁屁去睇醫生，驗到佢有好多蟲，一直杜咗三次至杜得清，咁同Amy 傾開計，我話屁屁佢需要定期杜蟲，我話我託姨甥幫我係香港獸醫診所買杜蟲藥，可以幫佢買埋，咁我姨甥幫我買妥仲已經寄嚟比我，所以我通知Amy 有杜蟲藥可以攞

咁Amy 話想探嚟我啲貓貓，佢又話帶埋佢屁屁嚟玩，屁屁係一隻無膽貓，平時一出街都已經淆晒底，縮起晒

一入屋，屁屁個樣已經好驚驚

Amy 話佢平時都唔鍾意人抱，但佢依家驚驚喔，抱佢出嚟坐係我大髀，郁都唔敢郁

奇哥仔走咗入屁屁個貓袋度八

佢啲毛好白滑

 比屁屁同我家貓貓接觸，又係驚到唔敢郁，有時仲驚到fee 貓

到Mango 仔去八人哋個貓袋，仲想走入去

再一次坐係我大髀

我哋傾吓講吓貓經又傾咗個幾兩個鐘，Amy 後來send 相比我睇，屁屁返到屋企已經定番晒，仲話唔比抱抱了

我仲送咗幾條魚扒比屁屁，Amy 話佢好鍾意食，食到好猴擒，食完仲不屑佢啲乾糧午餐咁話，哈哈

希望再有機會見到屁屁啦