借宿一宵

依家仔仔爸做嗰份工要返好早，佢零晨就要起身，到佢出門口返工我都仲瞓緊，尋日朝早仔仔爸返工，一出門口係電梯附近發現咗隻貓，佢先抱咗貓貓返屋企，佢話隻貓好乖，佢仲幫貓貓剪埋指甲，佢將隻貓安置係我隔離間房，放咗啲貓糧再閂埋門至出門返工

當我瞓醒起身，發覺點解間房會閂埋咗，後來至留意到仔仔爸留咗張字條

我入房睇吓隻貓，佢好驚人，仲好惡Woo 我呢

佢帶咗頸帶，咁即係有人養，應該係走失貓，見佢咁驚仲咁惡，我都唔敢打擾佢，再放水、砂盤畀佢，間中入去睇吓佢

最初見啲乾糧、砂盤都無郁過，阿姐嘗試畀吱吱條佢食，佢唔食仲好惡

 落街時，都唔覺有人貼失貓啟示，所以當晚就貼張告示落樓下大堂

今朝入房睇佢，見啲乾糧食咗少少，砂盤有篤尿，朝早開罐頭畀班貓地，又畀啲佢，初時佢都無食，再晏啲入去見佢食咗

佢匿咗去另一個地方

中午我又再畀啲罐頭佢食，佢都有食

黃昏時，我家貓地食罐頭餐，佢都有食

終於有人call 我哋，原來係鄰居貓，佢叫做Storm，主人嚟到入房叫吓佢，佢就走出嚟，主人抱起佢，但Storm 一見到我哋又發惡Fee 我哋

鄰居帶咗Storm 返屋企之後再嚟叩門要畀錢我哋，我哋當然唔要啦，希望佢要睇實Storm，唔好再畀佢走出門口，當佢主人聯絡我哋，我都鬆一口氣，幾驚佢係遺棄貓，我哋又要養多一隻

講開貓貓，上個月仔仔爸放工返嚟泊車，係Parking Lot 遇過呢隻虎蚊貓幾次，佢話見有帶頸帶，唔知係走失定係遺棄貓呢