Hugo 仔去絶育

以前啲仔仔、囡囡要絶育，都係帶佢哋去幫襯ASPCA 絶育車，要天未光就去排隊，到咗Mocha 嚟到，咁啱仲係COVID 期間，ASPCA 絶育車因為人手唔夠停辦咗，好彩嗰陣我姑仔幫我搵到Shelter 可以幫Mocha 絶育，四小B嗰陣就搵到另一間，收費平啲嘅地方絶育，今次輪到Hugo 仔要絶育，問過之前平嗰間機構，要排期到6月底，又搵唔到其他平收費嘅地方，咁啱早排屋村花園咪有流浪貓，敏姐介紹咗個義工畀仔仔爸搵人嚟捉貓，所以今次就試吓問吓呢個義工，可唔可以幫忙帶Hugo 仔去絶育，咁個義工話一有位就幫我帶Hugo 仔去絶育，義工幫我攝到位可以帶Hugo 仔去，覺得呢幾次要同貓地絶育，都好好彩搵得好快，可以快啲解決佢哋絶育問題

絶育前一日，食罐頭餐，為咗食，大家都唔理咁多

Hugo 仔又週圍去瞓其他貓地瞓過嘅地方

Hugo 仔真係唔怕貓，暫時Hugo 仔只係會忌諱奇哥仔，Mocha 同Mango 仔見到都仲會fee 佢，而啲細貓都唔多理佢，黑糖仔好似幾鍾意佢，見過黑糖仔同Hugo 仔咀對咀嗅對方

要告別呢粒大“蛋蛋”了

十點後要困房，禁飲食

第二朝，好容易就放佢入籠，佢真係好純品

都無貓嚟八吓佢

落街等義工嚟接佢

收到Call 即刻落街接番佢返屋企

平時啲貓絶育後返嚟多數都仲係暈吓暈吓，但佢完全無事

知佢肚餓，即刻畀罐頭佢食，佢食得好猴摛

唔敢一次過畀太多嘢佢食，隔一陣再畀

唔多覺係大傷口

第二日，Hugo 仔又係房度叫，一聽到Hugo 仔把聲，班貓又要去八

我入房陪吓佢，Hugo 仔真係幾黐人好乖

又唔覺佢會舔傷口，見佢咁乖，就放佢出嚟行吓，一出嚟就飲水

另一朝早，又放佢出嚟

奇哥就最唔妥佢，一見Hugo 仔就望到佢實

反而其他貓都只係望吓佢

呢日之後佢唔再困房，正式自由行，等成班貓地慢慢相處