黑貓有家了

我每日放工需要搭巴士再轉搭地鐵再步行至可以返到屋企，出地鐵出口時，我有時會係我隔離政府屋村嗰個出口出，因為我想餵吓松鼠，所以我會行入去政府屋村裡面個公園度，舊年時就係個公園度發現咗隻流浪黑貓

我知道佢有好多人定時餵佢，所以嗰陣我都無帶嘢食餵佢，只係間中去望吓佢

呢條片時，佢都同我唔熟，舊年冬天落咗好幾塲雪，而且氣溫仲好低，好彩佢都算肥，有啲脂肪，至可以捱得過

曾經遇過一餵貓阿姐，佢同我講呢隻黑貓係度都已經好多年，起碼八年以上，佢個名叫Marcia

當我去完香港返o黎，去望吓佢，見佢成隻瘦晒呢，瘦到縮晒水，我仲以為係另一隻貓o黎，而且發覺啲餵貓人又好似越黎越晏去餵佢，所以我開始袋定一啲乾糧，如行過見到佢會放低貓糧俾佢食，但如果我見佢唔到，我係唔會放低啲乾糧，因為會俾啲白鴿食晒

餵咗幾次，佢就已經俾我摸，不過佢仲係好有戒心

依家我一叫佢，佢就會出o黎，其實佢係一隻愛人摸摸o既貓o黎

上個星期我餵佢時，有個女人行過，因為佢見黑貓肯俾我摸，又肯食我比o既嘢

呢個女人叫愛姐，佢就住係呢個屋村，佢亦都知道呢隻黑貓o既事，愛姐都知道黑貓好多人餵食，所以佢都只係見無人餵食時才餵食，尤其舊年大雪後，都係佢去餵，佢話我知黑貓早排病咗，所以至會瘦晒，都係佢每日餵藥過佢食，佢至執番條命，愛姐話黑貓有病可能係佢去捉食咗毒藥o既老鼠至會病，我亦曾經見過黑貓攬住隻老鼠o黎舔

愛姐見黑貓呢次病完後瘦晒，佢都好驚黑貓未必過到呢個冬天， 愛姐點解會同我搭訕，其實佢原想睇吓我可唔可以收養黑貓，但佢一聽我有三隻貓佢都知無行，愛姐本身都有兩隻貓，一隻係黑貓，另一隻係雜色貓，其實政府屋村只規定每戶只可以養一隻貓或一隻狗，仲要申報，不過好多人都好似我咁養到超額

愛姐同我傾完之後，佢話佢想襯冬天來臨前，帶黑貓返屋企，其實佢本身又擔心黑貓同佢屋企啲貓相處o既問題，後來佢問我可唔可以幫手一齊捉黑貓，我當然無問題啦，所以愛姐約咗我今日幫手捉黑貓

其實我哋都怕黑貓會唔上當，好難令佢自動入籠

一去度，愛姐一叫佢就走出o黎，愛姐特登去買啲薄切火雞肉俾佢，愛姐攞啲火雞肉佢嗅吓，就丟啲火雞肉入籠，好快黑貓就走入籠食嘢

捉到佢嗰刻，我同愛姐都開心到大家擁抱咗一下

愛姐話佢已通知佢一個係pet shop做o既朋友，佢會幫佢帶黑貓去打針體檢，我一定會間中打電話俾愛姐，問吓黑貓以後o既近況

真係好開心，黑貓以後唔駛再食老鼠，冬天唔駛捱冷，街上少一隻流浪貓，真係好感動

希望街上o既流浪貓都好似呢隻黑貓咁，能夠遇到好心人，有機會脫離流浪貓o既行列，得到幸福