我家奇奇

之前講過話睇吓有無人貼紙搵三樓貓，但我Facebook 上啲貓友話，不如主動啲自己貼告示啦，咁又係 o既，如果我自己走失貓都會緊張同擔心，如有人發現通知就最好啦，所以我第二日就貼咗以下呢張告示

已經貼咗四日都無人問津，見貓貓甩毛好似嚴重咗，所以叫阿姐盡快預約帶佢去睇醫生

因為想快啲睇醫生，所以今次就無Book ASPCA，改去屋企附近嗰間獸醫診所，價錢就一定會比ASPCA貴啲啲

阿姐打去make appointment 時，同診所方面講過係我哋執番o黎的，所以佢哋幫佢scan 吓有無晶片，結果係無

醫生話佢有虱，佢要食杜虱藥之外，怕會傳染比三貓，隱陣起見，三貓都要食，另外仲要滴杜虱藥，甩毛方面，醫生都唔知點解，可能係啲虱影響，都開咗啲消炎藥試試，其他方面都算好好，例如牙齒好健康，再打埋預防針，仲抽血驗吓有無FIV 同心絲蟲

睇醫生時，醫生話佢好乖，個助手請佢食零食，佢都老實唔客氣，比個噹噹波佢玩，但佢就無興趣

醫生話佢大約五歲，但佢真係唔似五歲喎，但最重要o既係，原來佢係一隻已經絶咗育o既仔仔o黎，我同仔仔爸都勁失望，post 上 Facebook 話比啲貓友知，啲貓友都叫我認命，繼續做仔仔媽，真係搞笑

佢仲要兩個星期後覆診，睇睇啲皮膚有無好轉

磅重時話佢有 9磅，但我覺得佢應該無 9磅咁重囉，可能磅重時佢又郁o黎郁去，我抱上手佢真係好輕的，所以依家最緊要係谷肥佢，好彩佢都好大食，不停食，好似食極都唔飽咁，但我哋當然唔可以一次過比太多嘢佢食，唯有比密啲啦

有時我係房用電腦，就會抱佢去我房陪我

佢又係同Marble仔一樣，唔比我睇報紙

佢好鍾意呢個窗台位

有時又鍾意瞓係電腦枱底

睇完醫生之後返o黎，見佢係呢個位度，不停換姿勢瞓覺

仲瞓到不省貓事，哈哈

見貼咗告示都無消息，所以依家宣佈，佢成為我家o既一份子，阿姐話佢有一對好奇o既大眼，所以叫佢做奇奇，之前一直都以為佢係囡囡，好彩用咗呢個奇字，比較男仔啲，啲貓友仲叫佢做奇哥仔呢，哈哈

某朝返工前，Marble仔好嗲呢，佢驚會失寵嗎

當然我唔會偏心，其他仔仔我都會繼續錫