慶生日

阿娘我星期六生日，阿姐星期五就趕返o黎食晚飯，一返o黎就去搵貓，抱抱奇哥仔

阿姐話Marble仔又肥咗喇

Charco仔陪又埋枱陪我哋食飯

奇哥仔好識擦阿姐鞋，阿姐去邊都黐住阿姐

Marble仔都唔執輸，朝早走上床等阿姐起身

星期六我放工返到屋企時，阿姐出咗去銀行存支票，買鹽酥雞返o黎食

睇吓Marble仔個為食樣

當時我睇緊報紙，Marble仔係都要坐住啲報紙唔比我睇，影呢幅張之前，Marble仔又想坐我張報紙，我就推開咗佢，咁阿姐就比另一張報紙佢坐，就係阿姐旁邊，阿姐就摸佢個頭，當我又摸佢個頭時，佢就發脾氣，仲fee我，佢fee我個樣好好笑，佢平時好少fee人，幾秒後佢又即刻走埋黎坐住我張報紙，真係比佢笑屎我

之後夠鐘我哋出發去Brooklyn食日本嘢，阿姐知我想食茶漬飯，話呢間有

睇，個茶漬飯似湯飯多啲

食到差不多o既時候，收到大姑奶o既電話，話我大姑爺係屋企覺得暈，我大姑奶又去咗New  Jersey個女屋企同個外孫做生日，咁我哋咁啱係Brooklyn，就嗱嗱淋埋單趕去大姑奶屋企

去到仔仔爸就幫大姑爺量吓血壓，食埋藥，就等大姑奶趕返o黎至走

我同阿姐就係Basement 陪住大表哥隻狗Boxer，Boxer 都已經成16、7歲，至從我哋搬咗出唐人街，都真係有成7、8年無見過佢，佢身體都已經差晒，見佢後腳都有時都無力，都企唔到起身

以前Boxer 都好得意，好靚仔

望住Boxer 我都好心翳，諗到弟日我啲仔老時 o既病態，我都有啲眼濕濕，我估呢次應該會係最後一次見Boxer 了

第二朝，阿姐話想食糯米飯，所以我哋去咗間小茶樓度食點心，之後趕去戲院睇早塲，因為第一塲有半價

阿姐請我睇呢套電影，啲角色好可愛呢

阿姐話附近開咗間手卷店，走去試吓

阿姐請我食呢個龍蝦卷呢，成$20

好味，我覺得呢度啲手卷太卷又唔算好貴喎，又大件，算抵食

之後阿姐要去買薯條攞返去比男友仔食，呢間好出名，因為佢有好多款唔同o既醬汁，啲薯條又係原個薯仔即切即炸

一邊行返屋企，一邊要買鹽酥雞、菠蘿包攞返去比男友仔食

阿姐返到屋企，再執齊嘢，要執啲冬天衫、褸帶返去著，Marble仔陪住阿姐，個樣好似有啲唔捨得咁喎

要等埋仔仔爸返o黎至一齊出門口，幫阿姐攞嘢落車，阿姐就再黐吓個擦鞋仔

 又唔知下次阿姐幾時至返o黎呢