好胃口

上個月天師仔啲傷風鼻塞又番發，今次睇落啲鼻涕無上次咁犀利，但佢又無晒心機，連嘢都唔肯食，真係心痛屎，當然拿拿淋帶佢去睇醫生啦，睇完都係食番上次啲藥，食完十日藥仲要去覆診，覆診後，醫生驚佢都仲未斷尾，要再食多十日藥

佢初初無晒心機時，成日玩匿埋，又匿係枱底，又走上阿姐個枕頭度，想等阿姐安慰嗎

食完頭嗰十日藥都已經好番好多，再開始食第二療程藥時，佢啲胃口已經返晒o黎

之前見佢最鍾意食o既雞肉都唔肯食，其實佢好肚餓，想食乾糧又無胃口食，依家佢終於肯食番雞肉了，仲每次都食晒

以前Charco仔唔食雞肉的，但呢排佢又食喎，不過又唔會食好多，仲要人餵至會食

依家佢除咗胃口好番晒，仲成日走上電腦枱o黎阻搵我 

天師仔最愛玩o既玩具就係Da Bird，嗰陣有病時都唔肯玩，佢依家仲開始成日“嬲”我陪佢玩Da Bird o忝

以前得Charco仔一隻貓時，Charco仔唔愛食罐頭，試過買比佢食，佢只會食幾啖，或者舔吓啲汁就算，食唔晒罐頭好鬼嘥，所以以後都唔買，天師仔入門時，見佢食罐頭都唔係食好多，所以最後兩貓都無再食罐頭

事隔幾年後，我見Charco仔好似瘦咗，無再長肉，所以嘗試再買罐頭比佢哋食，今次就買呢個牌子靚啲啲o既罐頭，兼貪佢細細罐，就算唔食都無咁嘥

點知呢個牌子又鍾意食喎，雖然Charco仔又唔會食太多

仲難得係天師仔食完唔夠喉，食埋Charco仔食唔晒嗰啲

所以到依家都一直食呢隻牌子o既罐頭，仲會加其他牌子o既濕糧

上次天師仔唔舒服睇醫生時，咪開咗隻supplement 比佢，但佢唔鍾意食，今次醫生開呢隻，本身係藥丸，但可以要求造成藥水，每日食兩次，要食一世

食o既份量好少， 好彩可能係無咩味，每日朝、午食罐頭同雞肉時，都“o節” 啲係裡面，佢會自己食晒，唔駛特登餵佢，真係好，希望佢食咗呢隻supplement 之後，對佢有幫助，以後都唔會再有傷風鼻塞，無病無痛啦