中伏

我今次返香港最主要嘅原因係同我二家姐慶祝大壽，我二家姐個女已移民去咗澳洲幾年，阿娘生日，佢哋一家四口當然要返o黎同阿娘慶祝啦，見難得咁齊人，我當然都要返去湊高興聚吓

我今次返香港都係住係我三家姐屋企，當日返到香港都成夜晚7 點，放低行李，好鬼肚餓，就落屋村平台食飯

初初返到香港都係唔慣時差，第一日朝早同姨甥女食完早餐，我就自己去荃灣行吓，見到有捐血站，想話捐血幫吓人，點知篤手指話我血紅素差0.1，唔可以捐，可能係唔夠瞓又食得唔好啦，想捐血都無得捐，真失敗

見三家姐又多個鄰居養咗貓貓，好得意

原來有兩隻，右邊嗰隻比較怕人，左邊嗰隻唔怕我走近，但唔比我摸
 

夜晚我大家姐入o黎荃灣見我，咁就一齊去悅來商場樓下間薩莉亞食飯

舊年年尾，我三家姐個女生咗個女，而佢又搬番返佢阿娘度住，我三家姐幫手湊孫，其實我三家姐做家務助理，一星期返幾日，平時我呢個姨甥孫，如果我三家姐要返工，就搵其他人幫手湊，有時係我其他啲家姐啦，或者係啲契姨婆啦，今次我住係三家姐度，湊呢個姨甥孫嘅責任就交咗比我，所以我今次中伏了

好彩呢個o靚妹都算好湊，唔係就大鑊喇

有時我三家姐會先去買定早餐、麵包比我，等我湊B時有得食，但有時如果個B早醒，就帶埋個B一齊去食埋早餐，三家姐至返工，我湊B

但每個星期一，我個妹休息，佢做完針灸就會上o黎，每次我都會叫佢買個車仔麵上o黎比我食

得頭嗰兩日唔駛我湊姨甥孫，可以落荃灣行吓、睇吓嘢，見到隻矇眼舖頭貓