二家姐大壽

呢一日係我正式自己開始湊B 嘅第一日，好彩都非常順利，阿B 無扭計，其實佢都算好好湊，佢又好為食，只要有嘢比佢食就得，所以好多時三家姐會買定啲麵包返o黎比我餵佢食，佢雖然只有11個月大，佢食嘢一定要自己揸住o黎食，好鬼醒

其實就算三家姐駛唔駛返工，三家姐都好少係屋企煮飯食，好多時都係等埋姨甥仔、姨甥女放工返o黎出去食，今晚又係去悅來商場食

呢一日三家姐唔駛開工，中午我同三家姐帶住阿B，落平台食啲婆仔兩餸飯加點心，因為佢哋有我鍾意嘅蒸浣魚

下午我要去葵芳新都會廣場約咗個保險經記搞啲嘢，順便去行葵涌廣場行吓，幫阿姐買相紙

見葵涌廣場係好多嘢食，但得自己一個人買o黎食又好似無咩意思，諗住第日搵埋姨甥女一齊o黎試

之後搭地鐵返荃灣行一陣，去三聯打吓書訂

返三家姐屋企前，係樓下買咗個碗仔翅食，麻麻地

 晚上我約咗兩個Blog 友去三坡坊心血來潮食潮州嘢

 食到尾聲，突然攞個蛋糕出o黎，話同我提早慶祝生日，當時真係好感動

仲有禮物呢，真係多謝晒您哋

原本今次返香港都無諗住打擾啲貓友、Blog 友，所以都無咩準備手信比人，收到禮物，真係覺得好唔好意思，之後我哋食埋糖水，傾多陣至走

呢日係星期六，通常三家姐星期六日都唔需要開工，朝早就齊齊落平台茶餐廳食早午餐

之後我同三家姐返上樓hea 到4 點至出門口，先搭巴士去深水埗行吓，因為我要幫阿姐搵啲小玩意，去到深水埗一定要食番碗蛇羹

行玩具街

舖頭狗

我仲有掃街邊嘢食，好似去公和食必食嘅豆腐花、煎饟豆腐啦，仲有檔口仔嘅咖喱魷魚、螺肉、牛栢葉啦，不過我通通都唔記得影相，呢晚我約咗我二哥食飯，我二哥佢平時返夜班，今明兩日佢休息，所以佢約我食飯，我哋去咗三上水產食日本嘢

食完就返屋企，三家姐將前日食完隻德國豬手啲皮同條骨，加啲乾瑤柱，煲咗個粥比阿B 做宵夜，我都偷咗啲o黎食，嘻嘻，三家姐煲粥好好味，又好快就煲好，以前阿姐都好鍾意食三姨媽煲嘅粥，所以我send 咗呢張相比阿姐等佢“葡萄吓，哈哈

10月1日呢日係我二家姐做大壽嘅日子，亦係我正日生日

姨甥女Book 咗去悅來酒店食Lunch Buffet 同我做生日

食飽嘢三家姐就帶阿B返屋企，阿B要瞓晏覺，我陪姨甥女去千色滙買BB 零食，因為有九折，返屋企之前去咗花舖買咗紥花

返到屋企，個個都話要瞓晏覺，唔駛我湊B，我就匿番入房煲電視劇

直至四點，我同三家姐先帶阿B 去藍田海港酒樓，二家姐、二姐夫連埋我個妹都已經到咗，佢哋等人 o黎開枱打麻雀呢，咁佢哋又搵我“戥”住腳先，我都好多年無打過麻雀，而且我本身打麻雀都唔係好叻，佢哋就我有雞糊食，我坐低第一舖就食雞糊

直至我二哥到咗就比佢打，我就贏咗$20 起身

之前買嗰紥花係送比二家姐生日的，我姨甥孫女愛不惜手，成晚都攞住

祝二家姐青春常駐，身體健康

齊人開席，大家都有同我講生日快樂，二嫂仲比咗生日利是我，今年可以返香港同屋企人一齊渡生日，真係好開心