去High Tea、食蛇宴

通常星期五六日，三家姐都唔駛返工，除咗有特別Order，之前想約圓丸媽，一係就遷就唔到時間、一係約好又打8 號風球去唔成，今次無緣約圓丸媽見面，唯有等下一次啦

呢日圓丸媽話會去荃威花園“Lap 毛孩領養中心”幫手搞義賣，但我又一早約晒人，因為我有啲物品想話攞比圓丸媽去做義賣，咁圓丸媽話不如叫我自己去Lap 放低啲義賣物品啦

咁嗰朝三家姐就帶我搭巴士去荃威花園

一入到去見到有義工幫呢幾隻狗仔影靚相，但啲狗狗掛住瞓覺呢

放低啲嘢都唔敢留太耐，要趕返屋企接埋姨甥女同阿B 一齊搭地鐵去灣仔

我一早邀請我班好姊妹陪我去酒店扮名援去High Tea，除咗好姊妹阿芬o黎唔到，Kennis 同我細妹都特登攞假o黎陪我High Tea，原本約大家係灣仔地鐵等，但因為我要去交低啲義賣嘢遲咗，所以叫佢哋自己去萬麗酒店先

我哋擺烏龍，以為一個set 係兩人份，所以叫咗 2 set，但遲遲都係得呢一個，後來問吓至知自己搞錯咗，不過唔緊要啦，原來啲姊妹都唔係太愛食甜點，而且我哋都仲有點其他嘢食

餐High Tea 係我吹雞要食，難得大家咁俾面，呢餐當然係我埋單啦

之後唔記得係阿Pat 定姨甥女話附近有築地‧山貴海產，我哋就過去行吓

行完就落下一層搭船去尖沙咀

一落船，姨甥女就話要去買Lady M，咁阿Pat 就陪佢去買，我哋係五枝旗桿旁等佢哋，開始日落好靚

以前香港一入秋就有蛇宴食，可能依家香港秋冬季越o黎越遲，所以佢哋話仲未有蛇宴食

三家姐、姨甥女知我想食蛇宴，週圍去問邊度有得食，姨甥女老豆話華員會已經出蛇宴，所以見今日橫掂個個都請晒假，就訂夜晚食蛇宴

等姨甥女買完餅，就行返去彌敦道搭巴士去華員會

因為訂咗一圍，所以叫埋阿姐契爺，我大哥、二哥、二嫂一齊食，好姊妹阿芬o黎唔到High Tea，佢收工o黎同我哋一齊食蛇宴

細妹做咗飲食業三十幾年，真係相識滿天下，每次去唔同嘅酒樓食肆食飯，好多時都會撞到熟人，今次都唔例外，撞番以前稻香個總廚，佢私人醒咗碟芥末魚皮，我都係第一次食，啲魚皮好爽口

之前係築地‧山貴海產買的日本蜜瓜清酒，唔好飲，阿B 望實Pat 契姨婆，想Pat 契姨婆比啖清酒佢“嗒”吓嗎，哈哈

食蛇羹點可以無呢啲脆卜卜

 

食完個個都話呢餐啲嘢好得，份量又足，好好味，價錢又唔貴，阿姐契爺仲要爭埋單，真係多謝晒，下次返香港要多啲搵佢出o黎食飯至得啦，哈哈

返到屋企都食唔落甜品，件Lady M 要留番第二日做宵夜