無暖氣的日子

星期六見天氣凍凍地就打邊爐，每次係屋企打邊爐，仔仔爸都要開大啲個窗，有啲冷風吹入o黎，話咁至有風味喎

打完邊爐，臨瞓覺時都覺得唔對路，原來無咗暖氣呢，不過嗰晚冚住張蠶絲被都ok 嘅

但星期日全日就凍咗好多，屋企無暖氣真係好惡頂，因為我住呢個政府樓，都算係好早期建成，啲設施係差啲，週不時無熱水，外面唔算凍時，啲暖氣就勁到死，都外面好凍時，啲暖氣又唔太熱，真係比佢玩死，所以我哋必定有電暖爐係屋企

我坐係電腦枱前，要搵個細暖爐咁對住自己，連沖涼都要搬個暖爐入厠所至沖到涼

見到Chewy 係我張床度瞓，凍到卷成貓餅，即刻幫佢冚番張被

其實咁凍通常都唔會出街，不過仔仔爸話啲貓罐頭就o黎食晒，要去入貨呢，又先去Food Court 食咗飯至去買罐頭，今次唔食魯肉飯同臭豆腐了

嗰晚真係超凍，仔仔爸攞多張毛毡冚，睇Marble 仔幾醒，第一時間去取暖

閂咗燈，各貓各自搵地方瞓，最醒目都係天師仔，佢一定返佢自己間“房”瞓，即係個入牆櫃裡面，見Charco 仔依然係梳化瞓，都只可以幫佢冚吓毛毡

我瞓落床無耐，奇哥仔跳上床搵我，我打開張被，佢竟然走入o黎瞓，嘩好正呀

天師仔你係見到唔抵得要同仔仔爸投訴嗎，哈哈

半夜見到Charco 仔同Chewy 係床尾度瞓，其實好多時Charco 仔都係瞓係我床尾

嗰晚我用咗個油壓式嘅電暖爐，都覺得唔夠暖，所以第二晚我就摷咗阿姐以前讀大學住宿舍時買嘅電毡，冚多張係面至覺得暖，呢晚奇哥仔一樣有捐入o黎被竇同我瞓呢

佢哋係好鍾意呢，定係貪新鮮呢﹖

到星期二放工返到屋企，已經有番暖氣，咁毛毡、電毡可以收埋了，不過奇哥仔都係鍾意上床瞓，呢幾晚佢亦都有捐入被竇同我瞓，雖然只係陪得一陣，但都好過無