新晉貓奴

記得我姑仔個朋友阿Pat 嗎﹖之前暫託過靚女阿Flo 嗰個呢，半年前佢又幫Shelter 暫託一隻得幾個月大，後頸受咗傷o既靚貓女，叫Bubble

阿Pat 話佢都好驚人，去佢屋企初期，頭十日都匿埋，之後至慢慢適應，後來都好黐佢，但一有陌生人去佢屋企，又會匿埋直至陌生人走咗為止

半年個傷好番晒，再驗查過身體好健康，要帶佢返Shelter 幫佢絶育，搵領養

上次食母親節飯時，阿Pat 都有去，佢不停同我哋講Bubble 要返Shelter 了，佢好唔捨得，想問我哋可唔可以領養，老老實實，我已經5隻貓，都唔打算特登去養多一隻

最後Bubble 打動到阿姐表妹，即係我姑仔個女囉，佢返到屋企問過我姑爺仔，批准可以養貓，Bubble 可以入門了

早兩個星期六，我姑仔同表妹去Shelter 接Bubble，我同仔仔爸又去湊熱鬧，間Shelter 就係正唐人街

待領o既貓貓，有好幾隻都好肥美

入到去唔可以影相，所以影唔到Bubble，我仲帶咗個貓籠比姑仔諗住比佢接Bubble，但Shelter 用個紙盒裝住Bubble，咁姑仔話攞個貓籠返屋企，比佢做住貓屋先

接Bubble 前一日，Bubble 至做咗絶育手術，所以要帶頭罩

接咗佢出門口，阿Pat 趕o黎見吓Bubble，阿Pat 隔住個紙箱叫Bubble，Bubble 一聽到阿Pat 把聲就不停叫回應阿Pat，阿Pat 好掛住佢呢

一返到屋企返Bubble 先係厠所隔離，初時好驚呢，匿係個紙箱都唔敢出o黎

不過無耐佢就自己走入貓籠度匿埋，幾日佢就開始適應

我送咗隻貓碟比Bubble 做見面禮

啲玩具係佢玩開，嗰日阿Pat 特登攞o黎比Bubble

一個星期了，可以除頭罩

個傷口仲埋得好好

原以為佢咁驚人，諗住佢應該無咁快親陌生人，點知都唔駛兩個星期，就已經好親人

表哥表妹仲錫到佢燶，表妹仲買好多零食比佢食，佢仲識比手手，好叻呢

我姑仔話個個當佢係寶，其實姑仔一家都好鍾意貓，反而係我姑仔唔想養貓，可能因為我家咁多貓o既關係，再加上Bubble 係佢好友阿Pat  暫託過o既貓，依家反而輪到係我姑仔好緊張Bubble呢

見Bubble 有愛錫佢o既家，姑仔一家多個新成員，真係戥佢哋開心

上個星期六又要幫貓地入貓砂、貓糧，買完先去Food Court 食過早飯，食咗魯肉飯加藥饍排骨湯同一個麻辣米線，仲有買咗個臭豆腐，唔記得影相

之後返去停車塲攞車，見係停車塲旁邊間屋前yard有貓，其實之前經過都已經見過，有成五、六隻咁多，大部份都係黑貓，剪咗耳，今次只見到三隻貓

呢隻黑貓仲唔怕我哋，走埋o黎要我哋摸佢
 

 咁以後每次o黎幫貓地入貨時，都要o黎探吓佢哋先