飲飲食食

星期日喔，每個人都瞓得晏，除咗我，只有個o靚妹早咗啲啲瞓醒，就同三家姐去茶記食個Early lunch，有麵豉蒸鯇魚

見馬會有萬聖節金多寶，買番張六合彩碰吓運氣先

呢日都諗住去街，星期日週圍都咁多人，點知阿姐個契爺call 我，話同佢前女友入嚟荃灣搵我同三家姐飲下午餐，咁就約咗佢哋去Pizza Hut

食完仲要買埋下午茶返上樓比姨甥女食，跟住就幫三家姐執吓間屋，佢哋全家都鍾意買嘢，儲埋好多無鬼用嘅嘢，不過點都執唔掂，唉

另一日，食得樓下啲茶餐廳多都食到驚驚地，就走去大家樂食件三文治早餐，之後我又自己走去行吓附近街街

行完街返上樓，捉姨甥女兩母女落街食Lunch，之前我話返親香港都遇唔到啲工展會、美食節之類，咁姨甥女就話葵涌運動場有個美食嘉年華，咁我哋就走去行吓

左邊嗰個海蜇超難食

行到夠鐘至同姨甥女分開走，因為我約咗朋友係荔枝角食晚飯，食完晚飯搭地鐵返大窩口，見到Mr. Wally 係度獻唱

另一日我又係等姨甥女兩母女起身至去茶記食Lunch，我食我至愛嘅芙蓉蛋飯

 食完就帶個o靚妹去公園放吓電

 嗰晚等埋三家姐、姨甥收工就去食台灣麵，啲嘢都唔錯，而且好抵食

呢一日中午我約咗兒時好友陪我行街街，約咗佢去西九龍中心等，但我早咗出門口，所以我係長沙灣站落車，行過去，見到好肥嘅舖頭貓

仲有其他舖頭貓

跟住我話要食車仔麵，之前見有間食花膠車仔麵，所以先去搵嚟食

我覺得似牛筋多過似花膠

食飽我哋一路行去花園街，都未完全行得晒，好友老公就call 嚟搵老婆食飯，唯有放好友早啲走

其實呢晚我都約咗兩位Blog 友見面食飯，自己一個行完花園街就搭地鐵出尖沙咀，見仲未夠鐘，加上想去洗手間，所以一出地鐵就走去The One 搵厠所，見到有Saniro 卡通公仔，好可愛

是晚約咗車媽媽、Olivian，車媽媽成日去食好西，約佢食飯一定有好西食，呢晚佢帶我哋去呢間食私房菜，有火窩有西餐

我哋預先book 咗食火窩，order 定個麻油雞湯底，個麻油雞真係好正，食咗個麻油雞已經飽咗一半，所以其餘啲火窩料都食唔晒，一邊食一邊開開心心傾咗一晚，最後仲要多謝Olivian 台灣嘅零食手信，仲有車媽媽嘅禮物，下次返香港都要搵車媽媽帶我去食美食

車媽媽呢支貓手唇膏，連阿姐都話cute，真係多謝晒，有啲唔捨得用