食蛇宴

去完泰國玩咗五日，之後我都無懶床，早起身自己去茶記食早餐

自己走去買啲嘢，返去等埋班爛瞓豬起身，細妹繼續放緊大假，等到佢哋瞓醒，又係就細妹去樓下酒樓飲茶

食完返上樓大家都狂hea，但我有幫手執吓屋，仲落街買出爐蛋撻比細妹食，既然咁hea，等三家姐姨甥收工返嚟，決定叫Pizza 外賣食就算

呢朝同埋姨甥女、三家姐一齊去食早餐，食完姨甥女要去覆診

咁我就陪埋三家姐帶個o靚妹去明愛睇眼科，睇完返到屋企，三家姐要開工，等埋姨甥女返嚟，又到下午茶時間，摷醒個妹又去生記飲茶

細妹話要去剪髮，佢行先，返屋企時經過髮型屋，入去搵細妹，其實我唔係想搵佢，只係見髮型屋老闆娘帶咗隻狗返舖頭，乘機入去抽狗水，哈哈

呢晚細妹又懶唔想出去，咁等埋三家姐姨甥收工，就係樓下間大快活求其食，個妹連落樓下都懶，我先買咗個飯攞上去比佢，再返落去食

呢日等細妹睇住個屎o靚妹，我陪姨甥女去太子個中醫師度配藥，仲要去法援署交表，記得我上次同Kennis 行花園街時，見有間新開嘅文記車仔麵，我話要去試吓

搭地鐵時係地鐵站美心買咗個蛋糕，就返大窩口，等埋三家姐收工返嚟，一齊搭地鐵去佐敦

話說我侄女婚宴嗰晚，我二哥話上年我哋去華員會食嗰個蛇宴好正，話今次要再食，佢話佢請，仲即時訂埋日子，姨甥女後來就book 咗呢日

Book 咗兩圍，除咗我其他啲阿哥，家姐，二哥叫埋佢契爺兩公婆，咁佢預多半圍比我啲best friend，好姊妹一齊聚吓

唔知係咪二哥嫁女嫁得好開心，呢日佢都係新外父上身，猛話招呼唔到😄😄

呢日同時係我個好姊妹Kennis 生日，個蛋糕諗住比個suprise 佢同佢慶祝生日，點知可能傾得開心得滯，都唔記得咗呢件事，食完走行去搭地鐵時至記得，我同姨甥女行番轉頭攞番，咁都唔記得，我真係無鬼用，無同Kennis 慶祝生日，真係好sorry