託貓 — Day 1

話說姑爺仔帶咗Bobby 仔走後，佢曾經話過會帶埋另一隻三色貓走，所以我哋都期待幫隻三色貓沖涼

姑爺仔話Bobby 仔同三色貓係街時，只有Bobby 仔會上郵車玩，帶走Bobby 仔後，隻三色貓都開始上郵車玩同食嘢，佢話等三色貓慣啲就可以同Bobby 仔一樣咁捉佢

我姑仔因為見Bobby 仔咁百厭，搞到Bubble 驚驚，其實佢都唔想咁快捉隻三色貓返屋企，仔仔爸咪話咁我哋幫您哋湊住先囉，所以再上個星期六已經將佢捉走，姑爺仔一收工就車隻貓出嚟，我哋係樓下接貓

放咗佢出嚟有少少驚，匿咗一陣

氹番佢出嚟，比佢返入個籠度，佢好似安心啲

之後又氹佢出嚟，其實佢一啲都唔怕人，好易氹，仲會嗲人o忝

真係好乖、好純

因為捉佢入籠時，佢掙扎，搞到整損咗個鼻，仲有整親啲指甲流血，所以決定唔同佢沖涼住，改用滴露水同佢抺身同滴蚤水，覺得佢好乾淨，一啲都唔污糟

帶佢返入房，佢唔算好驚，仲週圍八

又一啲都唔怕人，仲親人o忝，真係一啲都唔似流浪貓，查實佢同Bobby 仔都係有人養的，不過一直係放養，無得入屋，因為屋主屋企養咗兩隻惡狗，我姑爺仔話，佢二年前已經見過Bobby 仔，當時Bobby 仔仲係一竇貓仔之中其中一隻，佢主人係一個西班牙家庭，話其他貓仔都已經有鄰居收養，剩番Bobby 仔，隻三色貓其實係Bobby 仔媽咪，佢個名叫Anna，不過唔方便再叫佢呢個名，所以我幫佢改咗名叫Angie，不過我姑爺仔覺得呢個西班牙女人，根本都唔理啲貓，見佢哋剪咗耳仔，都知係啲義工幫手做絶育，之前Bobby 仔條頸傷咗，個女人夠話會帶佢睇醫生，都知佢係大隻講，再加上依家隻貓已經聽慣咗姑爺仔架郵車嘅引擎聲，一聽到聲就走出嚟，上次差啲車親佢，所以真係要早啲帶佢返屋企，唔好再比佢係街流浪