尋日Charco 仔已經離開咗我哋，去搵天師大佬同Marble 細佬
月頭嘅時候都仲覺得佢ok，都仲會出去厠所大小便
某日見佢行到半路無力就係走廊大便，仲會係床度小便，所以又再放貓砂盤畀佢，唔再畀呢個貓砂盤，呢個高身，怕佢無力跨入去，Chewy、奇哥、Mango 仔都鍾意用人家的貓砂盤
所以畀個錫紙盤，矮身啲，方便佢走入去
有時又走去瞓係啲衫上面
仍然好肯食，不過見佢乾糧又食得少，又好似食得好辛苦，就唔再餵佢食乾糧，每一個鐘頭我就畀啲罐頭佢食
某日見佢匿咗係個heat 頭後面，仲係地下小便，感覺佢開始有唔妥
嗰晚我哋開飯，佢難得走出嚟
咁呢晚我又返房陪佢瞓
花生嚟探Charco 哥哥
佢平時係一隻唔叫嘅貓，依家佢見我入房會叫吓我
佢見我入房上網，走埋嚟要陪我
之後一日，佢體力越嚟越差，只係間中有力上到砂盤大小便，無力時就敞住大小便
見佢個肉球、耳仔、牙肉都變白，無咩血色，知道佢應該貧血得好緊要
呢日我成日個心都好唔舒服，係感應到佢就快要離開我嘅先兆，佢會走近門口個床位等我入房，想我陪住佢
佢臨走呢晚，都有食嘢，但每次都只食少少，我哋都估計佢未必過到呢一晚
到12 點我起床去睇佢，佢已經走咗，摸佢身體仲係軟熟，佢只係啱啱走咗無耐
叫醒仔仔爸，仔仔爸幫佢清洗乾淨身體，因為佢身上有尿羶味，手腳都黐咗貓砂
Chewy、Mango 仔嚟同Charco 哥哥道別
仔仔爸將佢屍身袋好加乾冰，放入發泡膠箱保存
要帶佢去診所，診所會交畀殯儀火化
又係好慢好慢咁行去診所
放低佢之後，唔想即刻返屋企，就週圍行吓，沉殿吓心情
返到屋企又做清潔工作，都無胃口食飯，每次行入房望住張床，都百感交集，Mango 仔唔知係咪掛念Charco 哥呢
到咗第二日，平時朝早仔仔爸負責派早餐，我就負責派晚餐，連仔仔爸都話，突然要分少一個貓碟，都好唔習慣
Charco 仔你係我家第一隻貓地，仲陪伴咗16 個年頭，真係好唔好唔捨得你，你永遠永遠係爸爸媽媽阿姐嘅心裏面
再上個星期，阿姐個C 表姐隻豆腐都去咗彩虹橋，我都已經有好多年無見過豆腐了
以後佢哋再無痛苦，係彩虹橋健健康康生活，只要活在我哋心裏面
係雜誌睇到一段文字，好感觸︰
『動物的壽命，沒有人類這麽長，但願在有限的生命裏面，都感受到有人疼錫，直至終點站 時，都能帶着人類濃濃的愛，踏上彩虹橋』
希望我家的寶貝，都係帶住我哋嘅愛，走上彩虹橋
