天師仔仍然好大食，仍然每日幾罐細罐頭，加一餐雞肉餐，所以我入定好多貨
每朝畀貓奶佢飲，因為佢要食甲亢藥
佢呢幾個月開始好揀食，唔知係咪食厭咗，依家連吱吱醬條、湯包都唔食
平時佢食嘢，一定唔會食清碟裡面嘅食物，我要每次添一啲畀佢
佢食唔清嗰啲罐頭，有時會畀行過嘅Chewy 同Mango 仔食咗
有時食剩唔想食，要溝其他罐罐撈埋至肯食，中午就一定要開魚肉罐頭溝埋至肯食
有時要氹吓佢，讚吓佢good boy，佢又會食少少
畀佢食咗一輪，我又會畀佢抖吓，瞓吓，直至佢醒咗嚟搵我攞嘢食至會再畀
佢依家想食嘢會咁樣通知我
之前佢額頭啲膿只影響右邊面，依家連左邊都開始流膿，而且仲發出臭味
唔知係天氣熱定咩事，有時佢抖氣好大聲好重，仲會好似狗仔咁抖氣
瞓覺都要擘大口抖氣瞓
所以我會開風扇吹住佢
兩個月前佢鍾意匿係我床底瞓
8 月份，佢需要睇醫生抽血，refill 佢啲甲亢藥，睇完醫生返嚟可能唔開心，又唔多肯食嘢，又成日匿咗係仔仔爸個床底度瞓，要成個星期至好啲
佢胃口好時，成日嚟搵我添嘢食，仲會跳上梳化搵我快啲畀
佢依家完全唔會理毛，佢大脾同肚仔啲毛都結到一舊舊，我會幫佢梳吓毛
其實佢啲胃口有時都好反覆，好似尋日早上，畀罐頭唔想食，已經加咗魚肉罐都唔食，唯有試吓整啲雞肉溝吓，睇佢食唔食
佢嗅到雞肉想食，但唔肯自己食，咁我就餵佢，佢好想食，但好似吞唔落
咁剩係畀雞肉佢食，佢剩係舔晒啲汁
但見佢又難得咁去飲水，平時佢唔飲水，所以每次添罐頭都會加少少水，等佢吸收水份
見佢想食，但又唔肯食，又係度等，我都無晒佢符
後來我要出去做婦科檢查，兩個鐘後返嚟，佢又肯食番嘢
好似今朝咁，見只食剩少少肉泥罐頭，又唔想咁快開魚肉罐，又試吓開湯包溝吓畀佢，佢今次又肯食
另外有樣嘢佢真係好抵錫，每晚一閂燈，佢就自動自覺瞓覺，成晚都唔會嚟騷擾我哋，朝早都會耐心等仔仔爸起身，所以仔仔爸一起床，就會即刻開貓奶畀佢食藥兼墊肚，再同其他貓地一齊再開早餐
佢咁揀食，我都好頭痛，不過都好過佢唔肯食嘢，佢每次唔想食嘢，我真係好驚
阿姐預產期係12月尾，一般人搞Baby Shower 都係差唔多生至開party，但12月已經好凍，所以襯住天氣和暖，想可以係室外搞，所以就提早啲開party
一去到阿姐屋企，只見Macy 係廳
其餘三貓就匿咗係房，2R 就困係basement
去睇吓阿姐啲佈置
阿姐二姑媽係廚房灼油菜，開罐頭鮑魚，Macy 可能嗅到鮑魚味，走入嚟廚房唔願走
啲親戚朋友開始陸陸續續咁嚟到，Macy 好乖去負責招呼人客
收到好多禮物，大部份都係好實用嘅紙尿片
未來襯家奶奶好叻，幫個party 整咗啲手作仔
尤其呢兩個蛋糕整得好靚，可惜下面嗰嚟嗰陣整散咗
後來Macy 招呼客人招呼到攰，走去鞋堆度瞓覺
我無嘢好做，就入房陪啲孫女
Mittens 可能聽到出面多人，已經匿咗係床底
大家都整咗好多嘢食，仔仔爸負責BBQ，未來女婿啲屋企人對我哋整或買嘅唐餐好受歡迎，佢哋仲讚仔仔爸好貼心，寫埋係啲咩味
後來未來女婿帶咗Rocky 出去散步，我就落土庫陪Rose
襯天黑前要宣布BB 性別，一個月無見，阿姐個肚大咗好多
大陪份人估係BB 仔
係粉紅色紙碎，係Baby Girl，好開心呢，我鍾意女，阿姐兩公婆又係好想係女
食埋個靚靚蛋糕就完結個party
一返到屋企，天師仔就追住我哋攞食，陰公，餓咗幾個鐘頭
我又學阿姐咁，send 張相畀佢，話佢知已經返咗屋企，係Mango 仔“如厠圖”，哈哈
後來阿姐同我講，大家走咗之後，開咗大罐罐頭畀貓地食，安撫貓地
received_454825039914684.jpeg)
嗰日正直係中秋節，咁啱搞party 當係團圓，不過當晚就好多黑雲遮住咗個月
