攝箱罅

天師仔好鍾意用放係呢個大箱裡面個貓抓板，仲鍾意攝自己係條邊度

仲可以瞓到冧滋滋o忝

仲係啱啱fit

Marble仔個身型就…，成塊貓抓板都可以比佢覆蓋住

都係攤係出面算把啦，哈哈

天師仔係都要爭番箱嗰個貓抓板o黎用

執位

唔知係咪天氣開始凍，有貓開始進駐一啲平時好少坐o既位

例如呢張餐枱櫈，平時多數係Charco仔坐的

Marble仔間中都會坐，由其有人係廚房整緊蒸雞o既時候

天師仔依家多咗上去坐

走廊張床褥頂好耐都無見貓上去，近排見天師仔再上去坐同瞓

原來Marble仔都會

梳化不嬲都係Marble仔o既地盤

至從我攤開咗張Blanket，天師仔就成日瞓上去

Marble仔唔瞓梳化時，佢多數都係返阿姐房瞓貓床

Charco仔就繼續霸番佢張電腦椅

連仔仔爸都要讓晒佢

咁講到最暖當然係上床瞓係被面上面啦

睇，三隻貓都係咁鬼醒

阿姐在家時

阿姐係11月時，放感恩節假放咗6日，記得佢返o黎一入屋，阿姐見到Marble仔，猛咁叫︰Marble，Marble，Marble仔都唔睬阿姐，仲成晚都怕咗阿姐，激屎阿姐呢

好彩第二朝，Marble仔都主動上床搵阿姐

都肯比阿姐黐吓

之後嗰幾日，間中都有上床陪阿姐，阿姐仲即刻send message show比我睇o忝

聖誕連元旦阿姐放成個月假，成個月流流長，阿姐唔玩game時，一得閒就去黐貓地

Marble仔呢隻為食貓，一見阿姐食嘢又要攞食

 初時Marble仔都會去黐阿姐

後來唔知點解，有時又唔睬阿姐，可能阿姐成日抱佢，佢唔鍾意啦

阿姐唯有用零食氹番啦

 阿姐又成日整蠱貓地

整蠱完Charco仔，輪到天師仔

 阿姐著住件表姐送o既聖誕禮物，好騎呢，哈哈

講吓其他嘢啦

之前咪講過阿姐年頭時考到車牌，所以襯佢放假呢段期間，我哋要楂車出街，都俾阿姐楂，等佢楂熟手車

上次返香港同阿姐去過星加坡食過叻沙之後，我同阿姐都愛上咗，阿姐係人哋個Blog度見教整叻沙，話想整o黎試吓，就搵日等我收工返o黎齊齊去買材料

又真係整得唔錯，同叻沙一樣味，只係我哋嗰個辣咗少少

連Charco仔都引到埋o黎，就知個叻沙幾得啦，wakaka

我本身係一個無飯主婦，我唔識煮餸，平時都係靠仔仔爸煮

返香港時阿姐食過涼伴木耳，我同佢都鍾意食，一次表哥個契媽整咗一兜鎮江醋涼伴木耳，酸酸辣辣非常好食，三家姐又俾咗一大包木耳我攞番o黎，見阿姐鍾意食，上網check過又好容易整，(因為唔需要煎、炒、煮、炸)，所以我又pat pat 痕想整比個女食

呢個係鎮江醋涼伴木耳，其實呢個我返o黎之後都整過一兩次

呢個係Wasabi 味，見某一個Blog友教的

上次我去食生日飯，嗰個白酒煮青口我幾鍾意食，阿姐上網話好容易整，話整比我食，見呢個菜係西餐，阿姐話不如整晒西餐，整我鍾意飲o既周打蜆湯，再焗個意粉，咁又同阿姐齊齊去老番超市度買材料

冰箱有盒雪藏蒜蓉包，焗番熱就食得，呢餐仔仔爸撟埋雙手等食，我有做阿四幫阿姐手o架，洗青口、開罐頭、攪吓湯咁啦

 Charco仔嗅到海鮮味呢

想問人攞嘢食

因為阿姐男友仔有part-time做，阿姐無得拍拖，要宅係屋企，每朝瞓到黃朝百晏至起身食啲嘢，有日佢call我叫我陪佢食lunch，真係一個遲來的lunch，我就3點前放工趕返唐人街陪佢食上海嘢，因為要就個lunch special，三點半前，所以阿姐先去order咗先

我入到餐館一見到就“嘩”，做咩點三個餐咁多，佢話叫定多個打包聽日做lunch喎，其實叫兩個都夠啦，本身我已經食咗lunch，諗住坐吓陪佢食之嗎，除咗呢一餐，都仲有試過同佢食其他嘢，不過就正常啲，無呢個咁誇張囉

呢排同阿姐出得街多，某朝天師仔壓住我件褸唔比我哋出街呢

尋晚阿姐就要返宿舍啦，臨出門口都要黐吓貓，阿姐個樣唔捨得呢