尋日好擔心 今日好開心

前日我放工返到屋企隔離個楝樓附近見到天師行過，咁我就即刻叫佢，（其實我都成個禮拜無見佢，都唔知隻衰仔又走咗去邊），佢一聽到我叫佢，佢就喵番我，咁我咪即刻開罐罐比佢食，等佢食完就同佢玩咗好耐

通 常如果我要走，我都會引埋佢一齊返我屋企樓下個貓竇附近，至會返上樓，因為我覺得佢返到我屋企樓下至安全，但係嗰日天氣有啲熱，佢都唔願行，行咗一半就匿 係張櫈底攤係度，咁我就唔勉強佢，當我行返屋企時仲見到Mary姐係度放狗，佢有兩隻北京狗，我仲指比佢睇天師係櫈底唔願行，之後我就返咗屋企

尋 日我返到屋企樓下，Mary姐一見到我就同我講，話我尋日走咗之後，住係我楝樓o既死肥仔攞石頭掟天師，（嗰個死肥仔真係好百厭，已經成日搞破壞，啲死鬼 仔真係無家教），嚇走咗天師，咁當時因為我去完Supermarket買奶，所以要先返屋企放低啲奶，咁我就落樓下周圍搵佢，但都搵唔到，當時我好擔 心，Mary姐話個死肥仔掟到佢，我好驚天師有事，但我又搵佢唔到，我都無辨法

今日終於比我見番天師，見到佢又好似物事都無喎，咁我就引佢去公園仔度開罐罐佢食，等佢食完就係我哋o既親子接觸，佢真係好嗲，想同佢影張相都唔得，因為佢成日係我隻腳度“lur”來“lur”去，都唔肯坐定定

點解我話今日好開心，除咗見到天師無事之外，另外就係天師肯坐我大髀啦

我 一路摸住佢個頭，佢好鍾意人摸佢個頭o架，佢好舒服呀﹐見佢坐得咁舒服，我都唔捨得咁快走，比佢坐多陣，後來有個幾歲o既鬼妹仔過o黎想摸佢，佢fee咗 人一野，就走咗落地食埋食剩嗰啲罐罐，我諗住等佢食完我就走，點知當我想起身，佢自己跳上我大髀，咁我唯有繼續比佢坐啦，因為真係好難得呀

坐係我隔離嗰個係Mary姐，佢舒服到擺咗個舒服姿勢想瞓覺o忝

呢張係Chocolate大肚嗰陣，Shadow、Chocolate一齊坐係我大髀度影，左邊係Shadow，右邊係Chocolate，佢哋兩個都好鍾意坐我大脾o架

我真係好開心呀，以後又有貓貓坐我大髀啦

非法入境者

係三年前，我老闆收留咗一對由墨西哥偷渡o黎o既姐弟，當時佢哋仲係好細個o既小朋友

前面係細佬CoCo，後面係姐姐DeDe，呢張係o黎咗幾日o既相

點解我老闆會收留佢哋，咁就要講吓我公司係做啲物，我公司係做蔬菜批發，我老闆租咗個農塲係Long Island，每年夏天就自己種菜ｏ黎賣，DeDe、CoCo打算養大啲帶去農塲養，後來我老闆娘唔捨得，就一直養係度，咪話我老闆娘唔捨得，我都唔捨得，佢哋好可愛ｏ架

原本DeDe大隻過CoCo，長大咗就變咗弟弟大隻過姐姐

我覺得呢張相好有“春光乍洩”feel

佢哋幾叻ｏ架，除咗識sit，比手手，仲識得聽三種語言，我老闆鍾意同佢哋講國語，我老闆娘鍾意同佢哋講英文，我就梗係教佢哋廣東話啦

佢哋好為食ｏ架，我成日買麵包呀、紙包蛋糕比佢哋食，佢哋最鍾意食蛋撻、飲奶茶，我哋平時喺係屋企帶飯盒做lunch，通常我哋會煮多啲飯呀，煲完湯啲煲湯肉呀，都會攞番去比佢哋食，好彩嗰陣啲米未起價唧，所以搞到佢地都唔食狗糧

我個女好鍾意佢哋ｏ架，有時星期六我老公唔駛返工，會帶埋個女ｏ黎探佢哋，仲帶佢哋去附近公園跑吓咁，如果唔係咁，佢哋無機會出街ｏ架，因為佢哋好大力，一個人好難帶佢兩個出去，平時最多係喺個倉度跑吓

但佢哋只做咗兩年狗仔就去咗彩虹橋喇，點解，佢哋係毒死o架，係食咗老鼠藥死o既，我公司買蔬菜，所以有老鼠都唔出奇，所以我老闆定期會搵滅蟲公司o黎放老 鼠藥，當日我見落咗閘，咪諗住放佢哋出去跑吓囉，老闆又唔係度，所以無人通知我放咗老鼠藥，咁就出咗事，其實我都好內疚，唔係我放佢哋出去，就物事都無， 佢哋好乖o架，又唔會搞住我哋做嘢，當我話比我個女聽佢哋死咗，個女都喊咗好耐，我到依家都仲好懷念佢哋

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

其實我原本託人攞Charco返o黎，係諗住帶番公司養，幫手捉晒啲老鼠，幫DeDe、CoCo報仇，後來係我諗計，keep番自己養，您哋都知啦，我奶奶 係唔比我養貓o架嗎，咁我同佢講話係帶番公司養，但要養大啲先，但後來我又同個女返香港，咁我同仔仔爸講，我驚我唔係公司，無人睇住隻貓比隻貓走咗出去， 我驚佢會比自己公司啲起貨車車扁喎，咁仔仔爸話養到妳返o黎至帶佢返去啦，其實我有私心想，就襯住呢兩個月仔仔陪住仔仔爸，等佢哋有咗感情，咁仔仔咪有得 留低囉，當我同個女係香港返o黎，我奶奶都成日問幾時帶隻貓走，我見仔仔爸都無出聲，我都知道我個奸計應該得逞，最後仔仔爸同佢阿媽講話由得Charco 仔係度，咁我奶奶見個仔咁講都無佢符，但講明唔可以再養，就係咁，Charco就做咗我家惡爺喇

突然間醒起一件趣事，就係帶個衰仔帶屋企嗰陣，因為Charco係全黑o既貓，仔仔爸整咗個火盤，要我帶住佢“攬”過個火盤至入得屋企，您哋話吖，仔仔爸係咪好迷信吖，依家我諗起都覺得好笑

怪癖

我見好多卜友啲貓地，都好鍾意搓被被、衫、或者會幫貓奴按摩咁，除咗係Charco仔小時候會係我張被搓過幾次之外，都無再見過佢搓被被，佢更加唔會有按摩服務啦

但係有時見佢好鍾意走去個洗衫袋度，咬住個洗衫袋，抓吓、抓吓，有時呢，有齋咬住，又“咕嚕咕嚕”好大聲

咁各位認為Charco仔呢啲係咪怪癖呢

仔仔兩歲生日

見到四月份都有好多卜友o既貓地生日，唔通四月份係貓媽媽生貓b o既高峰期

其實我都唔知Charco仔係幾時出世，因為我係喺五月六號托人攞佢番o黎，當時我諗佢大約四至五個星期大，所以我推番前一個月，咁四月十四號又比較容易記，所以就揀咗呢日做個衰仔o既生日

都實又係乘機搵藉口，搵啲嘢搞吓，買個蛋糕食

Charco仔對個蛋糕就一啲興趣都無，但係對綁住蛋糕嗰條繩就好有興趣

當我哋食完蛋糕之後，亞姐就同Charco仔玩遊戲

天師近況

我唔係日日都會見到天師，我每日放工返到屋企樓下，未必一定見到佢，有時係我個女放學返o黎，見到佢會call我，我就攞嘢落去比佢食

尋 日我去洗衣舖洗完衫返屋企，再攞罐罐落街，搵吓見唔見到佢，但又唔見，我只係放啲乾糧係個竇裡面，如果我見佢唔到，我係唔會放低啲濕糧比佢等佢自己返o黎 食，因為有時我發覺一放底無耐，啲貓糧會無晒，唔知係比人倒咗定係比啲白鴿食咗，之後仔仔爸放工返屋企叫我陪佢去買嘢，一落到樓下就見到天師，我就叫仔仔 爸返上樓攞罐罐同相機落o黎

佢好肚餓，不停口咁食，差不多食晒一罐

呢度就係我上次講佢損咗嗰度，已經好番晒，只係無咗啲毛，同啲毛比較汚髒，我仲發覺佢眼角有啲損咗，我又無藥可以幫佢搽，希望佢唔好惡化啦

一食飽就洗手

睇佢幾嗲，佢依家無咗Chocolate、Shadow，佢最親就應該係我，但係點都唔肯坐大髀，一抱佢上大髀，佢就跳番落地下

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

上個禮拜四，我見到娟姐，佢話我知Chocolate同啲貓b仲係個獸醫度暫住，醫生話啲貓b好健康，Chocolate都ok，而Shadow仲係娟姐屋企，娟姐話Shadow有甩毛o既現象，驚佢會有病，已通知個老番婆，希望佢可以快啲帶佢去睇醫生

我真係好掛住Chocolate同啲貓b，啲貓b應該又大隻咗好多，每次只可以睇番佢哋o既相

呢隻係Chocolate

轉載-請大家幫幫鴻鴻

轉載自尊善會blog，又有貓貓懷疑被虐，希望大家幫幫佢

昨天知悉小貓情況立即出網誌，但看了照片，再同義工談話，知道事情不可再拖下去，決定先帶貓看醫生，其他的都先不理了。 事情是這樣的：

昨天是捉貓做絕育的日子（這一個星期都會在長沙灣捉貓做絕育），捉了小貓後，義工一看小貓的情況，心中便猶豫起來，到底這隻小貓送不送去愛協好呢？

根據義工經驗，這樣的貓若送去愛協絕育，除非言明，如果不是的話，醫生一定會把小貓人道毀滅，因為小貓的右眼很紅；右腿斷了一截，而且還有血。
 

義工不想小貓被人道毀滅，便找屯門義工幫忙。屯門義工打算星期五帶小貓去西貢，於是小貓便在波叔那裏住了一晚。
今天，再同義工通話，越清楚小貓的狀況，越覺不能再拖（原本已找了Ｘ小姐先觀察小貓，我看了照片，只覺非要看醫生，因為右眼已滿眼紅液），決定找群貓會幫個忙，替小貓預約九龍動物醫院，得到Elaine仗義相助，約了五時半去，立即搵波叔送貓出來。
小貓去到醫院，改了名字叫鴻鴻（希望她鴻福齊天，大步躝過）。因小貓是街貓，又不算親人，而且受了傷，不能仔細檢查，所以用了氣體麻醉，小貓麻醉後，醫生叫了我進去講話。

醫生說，小貓的右眼已壞死，眼後面的東西不停流出來，右腿原來齊膝斷了，切口非常 整齊，醫生問我是否清楚小貓斷小腿的原因，我便照義工所言告之，但醫生似乎懷疑小貓被虐待（此事我已告之義工，她明天會再問清楚）。講了一輪，醫生問我願 不願意讓小貓做手術。這個當然，如果不願，便不會來，來，就是要做手術。醫生說，眼球已壞死，要切除，我毫無猶豫答好；醫生說，小貓要切斷後腿，變成三腳 貓，如果不是的話，會不停受傷，這個.....我猶豫了一會，醫生說，醫院內也有一隻三腳貓，看了三腳貓後，不再猶豫。

出來後才省起忘記拍照片，於是又問護士可否為小貓拍照，因為尊善會已沒有多少錢，變了「窮貓會」，幫不了這小貓多少忙。

說真的，不騙你，拍這張手術床上的照片就是為了籌醫葯費，希望大家伸出援手，有關捐助小貓的支助都會清楚列明，一切開支亦會清楚列明。

希望大家伸出援手！

 

仔仔康復中

真係好多謝各位o既關心，仔仔已經好番好多，啲胃口又返晒o黎，回復之前o既“男兒本色”，係之前要帶喇叭就唔開心囉

睇，個傷口細咗，又無腫，只係無咗毛好礙眼

佢個樣好唔“Nike”

佢坐咗係我前面好耐，佢好似想話我知，佢好唔鍾意帶喇叭咁，想我幫佢除，仲比我摸咗佢好耐添，帶咗喇叭之後，佢乖咗好多，又嗲咗好多

前晚已經幫佢除咗個喇叭，即刻成隻生猛晒，又跳高、又再周圍搞搞震，好鬼開心，佢帶咗喇叭嗰幾晚，都係去咗亞姐房同亞姐瞓，仲瞓到非常“丫咋”，霸咗亞姐半張床，迫到亞姐要“癡”埋牆瞓咁滯，但一除咗喇叭之後，佢又返o黎我張床度瞓

佢就係咁瞓“丫”咗亞姐半張床

佢仲要食多一個禮拜藥，講開食藥，其實個衰仔已經好乖，一抱起佢，佢知道要食藥佢都無掙扎，只係唔肯開口，要撬開佢個口，唧啲藥落佢個口度，佢又無出口咬、 又無出爪抓，真係好乖，每次食完藥，仔仔爸都會氹番佢，話佢乖，話佢知乖乖地食藥，快啲好番，就唔駛帶喇叭，佢真係好似識聽咁，之後會請佢食零食做奬勵兼氹番佢

見到啲藥都唔驚

好快個衰仔就會好番晒，希望佢啲毛快啲生番出o黎，無咗執毛真係無咁型仔