仔仔睇醫生

今朝約咗十一點去睇醫生，九點幾就約敏姐係我屋企樓下等，初初帶個仔落街佢都驚，係個籠度郁，咁敏姐就帶我坐巴士去，因為今日落雨，驚會塞車遲到，坐巴士都要差唔多一個鐘，都早咗十幾分鐘到，咁早點都好過遲，個仔坐巴士時就好乖無郁，其實我知佢好緊張

見 到醫生，醫生想同佢檢查，但係個衰仔好惡，您哋都知啦，我個衰仔唔鍾意比人攪，會發惡咬人，所以個醫生都怕咗佢，搵咗個男人o黎幫手“禁”住佢，仲要用毛 巾幪面，又要剃毛，個醫生一睇話佢個傷口仲發緊炎，見個醫生將已經結咗疤個傷口，都要夾硬整開，再打啲藥水入傷口入面，打咗幾支，Charco仔都叫咗幾 聲，我知佢痛，我見到仲心痛，個醫生話如果啲發炎擴散到肚入面就要開刀，聽完我幾驚呀

醫生話我知Charco仔依家有九磅幾，因為佢依家傷口發炎，唔可以打預防針，開咗兩種藥食兩、三個星期，見好番再去覆診、打針，最弊有種藥一日食三次，我哋平時要返工，點餵到一日三次，仲要啲藥要放脷底，真係好頭痕，今次睇醫生連藥要$200，咁帶得佢去睇醫生，呢啲錢都預咗駛

返到屋企餵咗一種藥，都係要夾硬o黎嗰隻，要放脷底嗰隻，我諗都要等仔仔爸返o黎至一齊餵，為免佢再舔個傷口，唯有再幫佢帶番個喇叭，一帶咗個喇叭就成隻“謝”晒，又乖乖返bb床度瞓覺，佢驚咗幾個鍾，都應該好攰

仔仔呢兩日胃口都好番好多，我都希望佢快啲好番，唔駛再帶喇叭，我都唔想再見到佢唔開心，另外多謝各位o既關心，好快仔仔又會搞搞震咁出o黎見大家