一直腫咗三、四日，一見腫咗第二日，我已經打電比敏姐問佢有冇相熟o既獸醫，我請佢幫我約時間去睇醫生，星期一打電話去，要約到下個星期一，嗰幾日見個仔好悶悶不樂，成日都搵地方“伏伏”，又唔係幾肯食嘢
仔仔爸見到個仔咁好心痛，見約咁耐至有得睇醫生，咁佢叫個女上網，搵過間獸醫可唔可以約到早啲睇，仔仔爸好驚佢係腫瘤之類o既嘢，我就驚住唔知係咪之前同Shadow接觸過，唔通Shadow有病傳染咗比個仔
到第四日，我放工返到屋企見佢腫咗o既地方損咗，但係又冇咁腫，我諗係佢自己咬損，我驚佢不停舔過傷口，我要比個喇叭佢帶，但係上次去絶育完個喇叭比仔仔爸掉咗，咁我唯有用張咭紙整個類似o既比佢頂住檔先
至從個傷口損咗之後，Charco仔就無咁悶悶不樂，不過要帶住個喇叭就唔係好開心，食嘢都唔係食好多，但零食除外，仔仔爸見有個傷口，咪用啲消毒藥水幫佢洗吓個傷口，搽啲藥膏，咁我第二日放工返屋企前先去咗pet shop買過個喇只比佢
之後一日我放工返到屋企，見佢喺個架頂度週身舔，個喇叭已經比佢整甩咗，仲唔知比佢收埋咗去邊，我搵勻成間屋都搵唔到，咁我唯有搵件細佬仔背心佢著頂住先
一比件背心佢著作就攤咗係度，勁唔鍾意
我除咗整過件batman披風比佢著住影相之外，都未試過比衫佢著，隻橙色都幾襯佢喎，不過後來佢又走上個架頂度又比佢除咗
之後一日個傷口起晒濃，又有啲血水，咁我哋又係咁幫佢洗傷口、搽藥膏，呢兩日都算好番好多，原本尋日約過另一個醫生去睇，見佢出過濃，都好番好多，所以就無去睇
個傷口都好“核突”，仲要繼續帶喇叭
今 日放工返到屋企又見個喇叭比佢除咗，又係唔知比佢收埋咗去邊，不過見佢個傷口又比尋日好好多，咁就比佢輕鬆吓啦，今日佢無咗個喇叭，成隻嘢都輕鬆晒，精靈 番晒，證明佢真係好番好多，不過食嘢都仲係少咗，今晚都係要繼續洗傷口、搽藥膏，咁約咗星期一個appointment我都會同佢去睇，橫掂都約咗，點都 要去睇過至放心，諗住順便打埋針、check吓up，佢都夠期要打針
初初見到個仔“謝“晒，真係好閉翳、好擔心，見佢好番好多，又肯玩番，先至放心啲
沒有留言:
張貼留言