退役貓抓板

兩貓一直都好like呢塊貓抓板

由其係天師仔

有時我哋會灑啲貓草落塊貓抓板度，天師仔會一路抓，一路high

睇，成頭都係貓草

兩貓一齊霸住

之前見有貓友用塊貓抓板o黎玩拉車仔，我哋又玩埋一份

除咗個貓抓板，仲有呢個貓兜，都俾天師仔抓花晒了

兩貓都一樣好鍾意呢個兜呢

Charco仔仲愛瞓兜兜

天師仔有時愛兜就唔愛板

我已經買咗個新o既貓抓板過佢哋，所以呢塊貓抓板將會連埋啲Recycler一齊丟，個貓兜就會保留

唔知佢哋有無唔捨得呢塊貓抓板呢

好鬼多零食 — Part 2

年頭時，Ada五寶媽又好客氣咁寄咗一大包禮物過我同貓地

相中Sheba & Royal濕糧，Charco仔只會食少少，開過後就唔會再食，我避免浪費，所以送咗俾敏姐餵佢啲公園貓

呢隻零食，我都唔肯定Charco仔鍾唔鍾意食，我諗住俾佢試吓，唔食就益啲公園貓

佢又肯食喎

最後只食咗一半，之後我每次只開半包過佢食，都總算無浪費

右邊嗰隻小食，佢都ok肯食

 

右邊呢隻係魚粒零食，睇，未食先舔脷呢

一開咗之後，佢嗅到好香，仲伸咗個頭入個袋入面，搞到成面都係啲魚碎碎

不過食食吓就唔鍾意食了，我都覺得呢隻魚乾有少少油，所以食剩少少都丟了

Charco仔除咗愛貓零食，佢都愛食生果，之前我都有講過佢最鍾意就係食皺皮瓜

鍾意到連汁都飲埋

睇咗咁多Charco仔鍾意食o既零食，咁天師仔呢﹖

天師仔只愛食本地出o既脆卜卜

有時佢都好咀刁，有啲味佢食食吓又唔鍾意，隔一段時間之後又會再食番，所以我哋成日都要入定啲唔同o既taste

每朝仔仔爸會有派零食o既時間，依家習慣咗，天師仔每朝都會等仔仔爸派零食

其實之前都仲有貓友送o既其他零食，不過就無影低

最後好多謝多位貓友曾經所送o既貓零食及禮物，各位都好愛錫我家兩隻黑蚊蚊，真係好多謝各位

好鬼多零食 — Part 1

幾年前，泰媽曾經寄過一啲貓零食俾我家貓地

其中呢隻內有魚乾仔的，Charco仔好鍾意食

上次返香港前，我特登問泰媽邊度有得賣，佢好似係日本買的，佢叫我去幫襯大隻美，大隻美有類似呢種有魚乾仔o既貓零食

最後我幫襯大隻美買咗幾盒“懷石”o既貓零食

Charco仔真係好鍾意食

佢仲會食到“餿餿”聲，所以我叫呢隻小食做“豬餿”

食完我成隻手板都係佢啲口水

泰媽舊年去日本玩，記得我家Charco仔鍾意食呢隻零食，特登買咗仲寄俾我，仲連同佢啲貓貓o既靚靚年曆咭送俾我，泰媽真係好有我家貓地心

天師仔雖然唔愛食，但都幫Charco仔多謝泰媽

仲有之前貓友送過我一啲魚扒俾我，Charco仔都鍾意食，所以同時又同大隻美order咗好多

Charco仔鍾意食，但天師仔就點都唔肯食

用魚扒引隻衰仔呢

睇佢幾為食

見有魚扒，Charco仔等人開俾佢食呢

天師仔只愛食雞肉，見貓友訂英國雞粒，想俾天師仔試吓，叫貓友預我一罐，點知貓友仲唔收我錢，送俾我家貓品嘗，真係多謝晒Deki

點知天師仔都係唔食，益埋Charco仔

仲有其他貓友送o既貓零食

仲有好多呢，留番下一part再講