天師仔最鍾意人同佢拍pat pat，尤其鍾意係厠所等人拍pat pat
每日仔仔爸沖完涼都會同天師仔拍拍同摸摸
但隻Mango 仔唔知係咪唔抵得，又成日嚟哄埋一份
但其實佢又唔鍾意拍屁屁，連畀人摸都唔鍾意，佢都係嚟搞搞震多，咁仔仔爸又會玩吓佢，哈哈
我平時要爭取時間煲劇，我會一邊陪住天師仔，一邊幫佢摸摸拍屁屁
就連佢係窗台貓樹度hea，我都遷就佢幫佢拍pat pat
連Charco 仔間中都會嚟討摸
佢霸咗天師仔個書包黐住我，Charco 仔佢平時唔係特別要人摸的，咁佢又唔介意我幫佢拍pat pat
奇哥仔係梳化瞓覺，我都會同佢拍pat pat，佢都好鍾意拍pat pat 的
以前Chewy 甚少走上梳化坐，試過一次我抱佢上梳化，跟住幫佢拍pat pat
之後佢就唔怕上梳化，一見我坐係梳化，佢會主動跳上嚟要我摸摸同拍屁屁
就算我行開一陣，佢都仍然留係梳化度等我
摸到佢好舒服，黐實我，好sweet 呢
我陪住天師仔時，佢又會成日走埋嚟討拍屁屁，我真係兩隻手都好唔得閒，哈哈
早排仔仔爸買咗個按摩器，貓地又唔怕，仲幾受落𠻹
睇吓奇哥仔幾爽
下個月頭係我生日，通常阿姐會提早返嚟同我食飯慶祝，雖然紐約開番堂食，但紐約出咗規條，要啲食肆檢查針卡至可以堂食，但阿姐佢唔想打疫苗，佢又無打針，咁佢話康州無呢個規例，所以叫我哋去康州食，加上佢呢個weekend又去搵外快，話可以帶埋我去陪佢開工
先去阿姐屋企放低啲嘢先，仔仔爸又買咗好多食材畀阿姐，見聽日中秋，阿姐鍾意食碌柚，我又叫仔仔爸買過比佢，仲要幫佢去埋皮，塊皮叫阿姐自己曬乾，等過農曆新年用嚟煲水畀佢同埋貓地沖涼抺身
入阿姐間屋要先經過男友仔阿媽屋企，見到佢阿媽隻狗綁係門口，佢不停咁吠我哋，好嘈
係阿姐屋企門口，見地下一地都係栗子，原來門前有棵大栗子樹
一入阿姐屋企，Rocky 已經係咁吠，佢見到我哋好興奮
見到Macy已經係個廳度，Sundae同S'mores 就係房入邊望我哋
Mittens 原先匿係枱底個紙貓屋度，後來匿咗入廚房
頂唔順Rocky 咁熱情，困番佢入籠
Rose 又要驚我哋，但又想同我哋玩
Macy 後來走番入房，Mittens 就係廚房走番出嚟匿係枱底
阿姐近排開始留意啲屋盤，佢又見到有間屋open house，見我哋嚟到就一齊去睇，呢間屋都唔錯，阿姐同男友仔都幾滿意，希望可以買得成啦
之後就跟阿姐去開工，餵貓
兩隻黑貓見阿姐開餐好緊張呢，隻長毛黑貓叫Beef，阿姐抱咗佢落地下，佢又跳返上枱
之前一日，阿姐去服侍佢哋，帶咗枝貓棒比佢哋玩，呢隻貓好鍾意
呢枝貓棒係喺我對面間老番藥房買，好平，所以阿姐叫我幫佢買多枝，見得番呢兩個款
呢隻貓真係好鍾意玩呢，枝貓棒會留低送比貓地
之後去行街買啲嘢，就去食飯，我話想食壽司
個菠蘿炒飯落咗咖喱去炒，啲味道好似星州炒米，所以我叫佢做星州菠蘿炒飯，哈哈
呢個甜品係炸香蕉伴雪糕，都好食
