2011年2月25日 星期五

2011年2月22日 星期二

又見豆腐

上個星期六,我哋有家庭聚會,因為二月份有好多人生日,好似阿姐啦、表姐、表妹啦,咁又農曆新年又無見過大家,都未有機會派利是,所以一於一次過搞生日扒地兼團拜

咁高興,波士頓姑媽、表哥、表姐都話o黎,咁表姐要o黎,當然會帶埋豆腐o黎啦

豆腐已經半歲大,比起上次見大隻咗好多

但啲比較細o既表妹,就怕咗佢,避走入房,仲要成日拖實佢,驚佢走咗入房,嚇親的小朋友





阿姐對豆腐愛不惜手,仲帶佢出去便便





今次o既聚會,仔仔爸整咗啲嘢食,有啲就係買現成o既,之前一晚,佢就整定三隻凍蟹

Charco仔見到啲蟹就成日騰入廚房昅住



蒸熟咗,放上枱,Charco仔又o黎鬼鬼竄竄咁昅住晒




睇吓佢都幾鬼竄





2011年2月18日 星期五

凳仔情緣

呢疊凳仔,Charco仔間中都會係度hea吓、瞓吓






有時又會匿係凳仔下面



因為Charco仔唔算好鍾意呢張凳仔,咁張凳仔又係正梳化旁邊,所以我哋睇完報紙都會好順手咁放啲報紙係張凳仔度

後來天師o黎咗,天師仔好鍾意呢張凳仔,成日都會係度瞓、係度hea







見啲報紙始終都有油墨,所以我哋唔再用o黎放報紙,我仲放咗張毛墊係張凳仔度,俾天師仔用




Charco仔見佢hea得咁舒服,週不時都會去霸吓o黎瞓








試過Charco仔係疊凳仔度hea緊,天師仔跳埋上去,迫走Charco仔,要霸番o黎坐

記得嗎,佢哋都會齊齊係疊凳仔度捕雀雀



以後都再唔會有呢啲o既凳仔照,因為呢疊凳仔已經“退役”,所以此情不再了





2011年2月13日 星期日

敏姐的貓

敏姐都係同我住埋同一個屋村,佢餵咗佢屋企附近啲流浪貓,都餵咗七、八年,佢對啲流浪貓好有心o架,好勞心勞力,成日都想,點樣可以令佢哋住得溫暖啲,食得清潔啲,有時夜晚十一、二點,都仲會見佢係度餵貓,佢依家大約餵八至十隻貓

不過我今次唔係想講佢餵嗰啲流浪貓,係想講佢家中所養的三隻貓

今次我同阿姐一齊去敏姐屋企玩貓

呢隻叫威威,佢好靚仔喔








敏姐話佢有六隻腳趾,威威個媽媽都係有六隻腳趾



敏姐話威威佢識得開門,但可能佢又驚喇,又未試過開厠所門,所以佢最後都無去開


呢個係黑黑,係女仔o黎o既,初初佢好驚呀,成日想走,後來俾我哋摸咗一陣,至定好多,後來我哋開咗門,佢都無即時走貓,但我哋一走出廳,佢同威威又再次匿埋


因為威威、黑黑好怕陌生人,每次我去親敏姐屋企,佢兩隻貓一定唔知匿咗去邊,所以今次去,敏姐要捉佢哋入厠所,我哋至可以係厠所度咸佢哋

今次探貓之前一個星期,黑黑牙肉發炎,剝咗十隻牙仔呀陰公,塊鏡個倒影就係敏姐
 


呢隻叫虎虎,佢已經十二歲,因為曾經有尿道炎,所以要長期食處方糧



敏姐話佢係一隻惡貓,係人都唔可以摸佢,會咬人,但唔知點解,由我第一次去敏姐屋企,虎虎就唔怕我,仲俾我摸,仲係好鍾意我摸佢個頭,但佢唔鍾意人摸佢個背,所以敏姐話我同虎虎好有緣

敏姐對啲流浪貓真係好有心,我真係自歎不如,通常敏姐叫我幫忙,我都會去忙,早排落大雪,我都有去幫佢剷雪,係剷走佢餵開o既流浪貓竇啲雪,再剷開一條雪路,方便佢去餵貓,兼俾啲貓有路出去食嘢

真係好佩服敏姐對流浪貓所付出o既勞力、金錢

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

情人節o黎喇,阿姐親手整咗啲心型朱古力、仲有朱古力士多啤利,打算攞返學,送俾啲同學








所以我都係度借花敬佛,送俾大家

祝大家

情人節快樂

Happy Valentine's Day