你睇我唔到

我屋企張梳化係黑色，所以當Charco仔係張梳化度攤抖，真係唔覺眼

發覺Charco仔細個o既時候真係好唔上鏡，好多時同佢影相，出o黎o既效果都係矇查查，到佢大個仔啲至有番啲Camera Face，唔知係唔係佢係黑貓，影相時又要開閃燈，我成日都覺得用肉眼睇同相中個樣都唔一樣，都係真貓靚過上鏡

餵松鼠

我屋企周圍都有好多松鼠，我個袋成日都放定啲無縠o既杏仁係度，隨時都可以請佢哋食

仔仔爸未轉依家呢份工前，佢每朝都車我返工，每朝我會先去停車塲warm up部車，等仔仔爸o黎開車，咁係我等仔仔爸呢段時間，就係我餵松鼠o既時間，有時同一時間會有好多隻出現o黎攞嘢食，有啲攞咗未必會即刻食，佢哋會搵地方收埋，當佢收埋之後，見我仲未走，佢哋會不停番轉頭問我攞

呢隻我叫佢做「小黑」，佢都唔算好怕人，又可能佢比較為食，佢夠胆跳上我身上攞嘢食

我每次比半粒佢，佢都會好以依家咁留係我隻手度食仲比我摸佢，其實佢見得半粒會好快食完，佢費事騰來騰去，呢隻小黑都好鬼懶，其他人見到，都覺得隻松鼠好似我自己養咁，不過小黑係前年五月中見過之後已經失咗跡，可能己經比車....

啲松鼠會叼啲厠紙返個竇度，等個竇暖啲

呢啲係松鼠bb，你哋睇唔睇到有幾多隻﹖

原本我有段片可以睇到我摸「小黑」，不過我驚你哋睇完我個樣會食唔落年糕、蘿蔔糕、油角....嘥晒啲嘢就唔好啦

仔仔—公公篇

係大約仔仔十個月大，我哋就帶佢去絶育，因為佢已經成日發姣，成日擒住我隻手

我哋係去ASPCA o既流動絶育車，呢o架流動車，每個月都會去唔同o既地方註守，只要上網就睇到咩時間會註守係邊度，我哋當然係等o架車註守係我屋企附近至帶個仔去，佢哋 每日只收二十隻小動物，所以要一早去排隊，當日我哋七點前去度，已經排到十八位，佢哋o既收費好平，如果出示低收入證明，仲唔收費，當時嗰度啲人見我哋o 既地址係政府樓（好似香港o既公屋），都唔收我哋錢，剩係收個喇叭錢，五蚊，不過仔仔爸比咗二十蚊，叫佢哋唔駛找，當係捐比佢哋，絶育之餘仲幫 Charco打埋預防針，返去接佢，佢個樣仲好可憐呢

由放Charco仔入貓籠到去到流動車，佢都好乖，喵都無喵過一聲，但係睇佢個樣，其實佢都有啲驚

佢返到o黎，好唔開心，兼且佢又好唔舒服，成日想舐個傷口，所以情願返個籠度坐，籠底張紙仲有Charco仔啲血漬

仔仔爸驚Charco仔疴硬屎，會“high”親個傷口，所以餵罐罐佢食，兼同一個理由，仔仔爸唔用貓沙，用啲碎厠紙代替貓沙

佢帶住個喇叭，真係好唔舒服，成日週圍撞，想撞開個喇叭， 想瞓又瞓得唔舒服，要我摸住佢面豬登至瞓到覺，要過兩日佢至習慣個喇叭

因為佢成日想舐個傷口，所以要帶足七日見個傷口好番啲至比佢除

我見香港啲卜友帶貓地去絶育要再返診所拆綫，但係係呢度又唔駛嗰喎

Charco仔同大家拜年

失驚無神嚇死你

Charco仔佢剩係揀阿姐o黎嚇，我同仔仔爸試過係佢身邊行過，都無撲出o黎，再次叫阿姐行過，個衰仔又試撲出o黎，仔仔爸再次睇番呢條片都覺好好笑

仔仔—梳毛篇

見好多卜友o既愛貓都好enjoy梳毛，但係Charco仔最憎就係梳毛，每次梳毛都要同佢搏鬥，又要同佢梳，又要唔比佢咬

首先用有圓頭o既梳同佢梳，都ok o既，因為唔會梳痛佢

一轉用鐵線梳，就間始發爛渣，同你死過

仔仔爸又比佢咬到隻手“花”晒

通常呢啲咁高危o既工作，都係仔仔爸負責

另外剪甲都係佢最討厭﹐睇同佢剪指甲，佢幾惡死，好似想同你死過咁

雪藏貓

唔知點解Charco仔至細就好鍾意去雪櫃，而家一聽到有人開雪櫃，就會即刻走埋去，有時會跳入去，有時會攤係度，懶死唔走

係 佢細個o既時候，佢試過比我奶奶關係雪櫃裡面，我奶奶唔係有心關佢係雪櫃，佢根本都無留意隻貓跟住佢開雪櫃，後來仔仔爸搵過晒成間屋都搵唔到，佢突然醒起 佢阿媽應該開過雪櫃o黎攞奶沖咖啡，咁佢即刻開雪櫃睇吓，真係係裡面，我諗佢起碼係雪櫃裡面都有成十分鍾，之後佢都無陰影，一樣成日走去個雪櫃度八，而且 佢知道啲蝦米係放係雪櫃，佢更加要去啦，見到佢懶死唔走，多數都會攞幾粒蝦米引番佢出o黎

Charco︰你唔俾蝦米我食，我就賴死唔走

有好消息

我今日放工返屋企見番Shadow啦，不過就見唔到Chocolate，我諗Shadow已經“蒲頭”，咁Chocolate都會好快出現，後來見到清潔 阿姐，佢話比我知隻貓女之前都係度，咁即係話兩隻都返咗o黎，都唔知佢兩隻嘢去咗邊度玩，玩成個幾禮拜至返，真係擔心死我，我見到Shadow瘦咗，好心 痛呀，其實住係呢楝大厦啲人都算係咁，其實都有人唔鍾意佢哋，不過起碼無難為、傷害佢哋，總知，見番佢哋，知道佢哋無事，我真係好開心

Shadow個樣好似好唔老皮

仔仔—第二次去街街篇

Charco仔第二次去街，今次目的地係我屋企附近o既公園（Battery Park）

睇，帶佢出街唔駛用貓籠或者貓袋，放係個袋就掂，佢都驚到唔敢郁，佢呢個樣好公仔呀

開始無咁驚周圍八，後來比佢見到啲雀仔，想去捉雀仔，佢嚇走啲雀仔，佢都不知幾開心呀，最後佢竟然唔肯走

初初佢上車，佢都係匿係凳底，後來阿姐抱佢坐大脾，有帶安全帶好安全

帶過佢二次出街之後都無再帶佢去遠o既地方，咁之後都係帶佢落樓下公園仔行吓，不過試過幾次佢比人或者貓嚇親，佢就匿係樹叢底，死都唔肯出返o黎，捉佢返出o黎又發爛渣咬人，所以已經無再帶佢落街

我的契仔契女（下）

我好想“老笠”佢哋返屋企，但係我奶奶唔比，我哋養Charco仔 佢都唔係好鍾意，佢話明唔可以再養，我又開始擔心，到咗冬天佢哋唔知點渡過，後來我問我老闆、老闆娘我可唔可以帶佢哋返公司養，佢哋都話無問題，我就開始 諗點樣捉佢哋，有一朝我帶埋貓籠落樓下，我捉佢就好容易，因為佢哋都肯比我抱，但係佢哋死都唔肯入個籠度，所以嗰朝捉貓就失敗咗，之後我都唔知點算好，點 知原來想捉佢哋係好簡單，就係我抱佢返屋企，最先我係抱Shadow返屋企，我唔敢帶佢坐電梯，我驚嚇親佢，我就行樓梯，佢一路都好乖都無掙扎，一入到我屋企佢自己仲行入厠所，咁我咪順便幫佢抺吓個身，其實我覺得佢哋都唔污髒，後來佢行去見到個沙盤，嗅兩嗅仲識去便便，好叻呀，真係抵錫，佢見到Charco仔一啲都唔驚，仲挑釁仔仔，反而Charco仔好驚仲fee佢，咁我就盡量分開佢哋，但係Charco仔又要驚，又想去睇Shadow（其實佢哋已經見過面、接觸過，因為之前我哋都有帶過仔仔落街散步，佢哋見過面，不過我唔肯定有無Shadow份），就咁Shadow就係我個厠所過咗一晚，第二朝我帶咗Shadow返公司

Chocolate都係照辨煮碗 咁 帶佢返公司，點知我養咗一個禮拜多啲，我老闆娘話佢對啲貓沙敏感，叫個帶佢哋走，我同老闆娘講我會換過另一隻貓沙佢都話唔得，我懷疑佢根本唔鍾意佢哋，我 一聽到老闆娘叫我帶走佢哋，我真係好唔開心，我覺得我自己好衰，佢哋都已經當咗我係主人，但而家我又要佢哋做番流浪貓，我真係覺得好對佢哋唔住

不過話時話佢哋雖然係有瓦遮頭，其實佢哋都好悶，佢哋放係樓上，老闆娘未返佢哋都敢落o黎同我玩，一有人係度，佢哋就唔敢落o黎，我得閒就上去同佢哋玩，我一坐低佢哋就兩隻一齊坐係我大髀，比我摸，佢哋真係好鍾意比人摸，但係我又唔敢同佢哋玩太耐，想炒魷咩

老闆娘叫我帶走佢哋，但我都拖到禮拜尾至帶佢哋返我屋企樓下，佢哋返到o黎都幾開心，學仔仔爸話齋，佢哋係度自由慣，天師一見番佢哋仲好開心添
之後我每日放工返屋企樓下，見到Shadow、Chocolate都會帶佢哋到公園坐，餵佢哋食貓零食，佢兩個會一齊坐係我大髀，迫迫哋但好得意，我要走放番佢哋落地，佢哋都唔捨得都仲想即刻坐番係我大髀度，佢哋係我心目中o既dream cat，又嗲又癡人

帶粉紅色帶嗰隻係Shadow，唔駛講另一隻係Chocolate，兩隻一齊坐係我大髀幾溫馨

睇吓佢，佢好enjoy係床度瞓

Shadow︰原來床係咁舒服o架

佢隻腳係曲唔到，所以佢坐低隻腳都係伸直，唔知點解，佢隻眼雖然唔係好大，但一影相對眼就會變咗「王喜」

上次帶Chocolate返屋企都唔記得同佢影相呢張就係Charco仔見到Shadow，好驚但有要搵“定”匿o黎觀察

妄   想

見到家中有幾隻貓o既卜友，啲貓打打鬧鬧、溫溫馨馨，真係好羨慕

我成日諗如果三隻貓成為我家一份子，咁我個卜名就要改名做“黑貓樂園”

我成日諗如果三隻貓成為我家一份子，我諗我一定會偏心三隻貓，咁Charco仔一定會呷醋，就會發狂咁咬我，咁我好唔好call消防捉佢呢

我係屋企見到Charco仔，我成日同個仔講，你就幸福啦做家貓，難為樓下啲貓要做流浪貓，要受風吹雨打，你仲咁惡死

呢成個禮拜天氣都好凍，早幾日前仲落過雪，尋日得華氏十二度，今朝得八度，我已經六日無見過Chocolate、Shadow， 都唔知佢哋去咗邊，個貓竇剩番天師係度，照計咁凍天時，佢哋都唔會週圍去，都盡量留係貓竇度，究竟佢哋去咗邊，希望佢哋無事，快啲返出o黎啦，仔仔爸話希望係有人帶咗佢哋返屋企，望就係咁望啦，我真係好掛住佢哋，好彩今日我都仲見到天師係度，我諗有同我一樣有餵開流浪貓o既卜友，都會明白我而家o既心情

最後希望啲卜友睇完唔好比我嗰啲寫得唔好o既言詞同長篇大論悶親