阿姐整嘢食

呢個星期仔仔爸攞物資嚟，其中買咗榴槤畀阿姐補身

女婿係老番胃，唔太想成日食唐餐，所以有時佢收工買嘢畀自己食，咁我又唔駛煮佢個份，有日女婿想食Pizza，就收工買個大Pizza 返嚟齊齊食

呢日買咗隻燒雞返嚟，攞一部份嚟加餸，食緊飯出現三隻為食貓，哈哈

上次我姑仔嚟探阿B 時，買咗兩pack 雞脾嚟，之前阿姐話過想試整麻油雞，見屋企有材料就試吓整嚟食

阿姐又話想整芋圓，啲芋圓好QQ，成功

每年聖誕，女婿媽咪都會送好多貓狗玩具、零食畀貓地狗地，但啲玩具阿姐又唔開畀佢哋玩，我幫阿姐執屋時，就開啲玩具畀貓地玩，但有啲佢哋又無興趣玩

又搵到幾隻梳毛手套，試吓貓地鍾唔鍾意先

測試結果係S'mores 超鍾意，所以之後，佢會成日入房搵我，想我幫佢梳毛

連Macy 都成日嚟黐住我要摸摸

有時無放Rose 出嚟過夜，2M 就成日瞓狗床，Macy 有時鍾意捐入狗床底玩

平時女婿係屋企，鍾意匿係Basement，會抱埋阿B 去陪佢，阿姐又落去陪佢哋兩父女，有次阿B 要食奶，我就去抱走女婿身邊嘅阿B，女婿講笑話我抱走佢個女，哈哈 

阿姐order 咗啲得意動物畫，係將阿B個腳板印上去，不過印得唔太完美

呢晚係我同阿姐、女婿、阿B、貓地狗地最後一晚

呢日BB 滿月，而且係我任務完成，功成身退之時，呢日仔仔買咗粥、腸粉、油器做lunch，諗住呢啲唔啱女婿食，最買咗KFC炸雞畀佢，又買咗啲熟食畀阿姐做餸

2R 一定係最期待公公嚟到

加上呢日又係正月十五，公公又嚟派利是

返到屋企，好彩啲寶貝無唔記得阿娘，尤其奇哥仔，我一坐低想除鞋，佢就即刻坐住我大髀

仔仔爸出門口前，約定咗敏姐食晚飯，順便派薑醋，去咗間新開嘅客家菜館，因為呢日係正月十五，飯後送上紅棗雪耳桃膠芝麻湯圓，好足料，正

同四隻貓孫、兩隻狗孫相處咗成個月有多，同佢哋混熟咗，都有啲唔捨得

我諗佢哋都會唔捨得我，尤其係2R，因為我食親蘋果，佢哋實分到一杯羮