去狗塲做義工

呢個星期六，約咗個Facebook 友去錦上路某一個狗塲做義工，呢個Facebook 友從來未見過面，見佢有時post 相話去狗塲做義工，所以一早相約佢如果我返香港，要帶埋我去

我都好鍾意狗，而且覺得唐狗好可憐，成日比人歧視，其實唐狗又忠心，又可愛

當日約佢係錦上路西鐵站等，我怕我遲到，我預早咗時間出門口，我仲早到半個鐘，咁我就去站外行吓

差唔多夠鐘，我行返入站內搵人相認，原來已經有幾個義工係度等緊，我哋一齊再等埋其他義工就出發去狗塲，其實狗塲離西鐵站都唔係好遠

當日都有成十幾個義工去幫手，去到狗塲Facebook 友Faye，叫我換番個腰袋，換對拖鞋或者係水鞋，先帶我入其中一個狗房，好多狗狗呢

開始幫手清潔，Faye 同另兩位義工幫手洗地，我都要負責洗狗兜、刷走啲水，Faye 好錫住我，只叫我玩狗，所以其實我都唔係幫手做咗好多嘢

我覺得啲黑狗特別乖、特別嗲，呢隻狗我一唔摸佢，佢就用手抓我隻手要我摸佢呢，真係愛屎佢

 佢哋每個狗房個名都好可愛

義工派零食，啲狗狗好開心呢

呢幾隻係熱情班裡面嘅狗狗，不過我覺得佢哋怕人，但都唔熱情嘅

清潔好晒啲狗房，就開始準備帶狗狗去散步，比狗狗去大小便，因為狗狗眾多，要分好幾次至可以帶晒所有狗狗去散步

我帶呢隻叫小寶

每個人個腰袋都袋住好多張報紙，每次狗狗大便完就要包好狗糞，放係路邊，其中幾人會負責收集呢啲狗糞，我係其中一個

又準備第二轉

傷殘嘅狗狗都要帶佢去呼吸新鮮嘅空氣

佢係阿矇

走第三轉，我只負責收集狗糞

呢啲係狗塲附近部份民居嘅狗狗，我哋行過佢哋都會吠叫

 有義工帶咗啲小食、糖水、水果o黎大家分享

啲資深義工真係好錫啲狗狗

最後一轉狗狗散步

我帶住呢隻叫Jo Jo

返到狗塲，有義工已經開始為狗狗準備晚膳

其他義工都開始離開，我同Faye 都留到狗狗食飽至走

多得呢班義工，班狗狗至可以有人陪玩，有得出去散吓步，我都好掛住班狗狗，真心覺得佢哋好可愛，下次我返香港都要再去做義工，比狗狗感受到佢哋係好多人錫，係好得人鍾意的

我返到荃灣，自己去食咗個薯粉至返屋企

聖誕奇緣

聖誕嗰日，食晚飯前，阿Pat 打比仔仔爸問，要唔要啲貓貓物資，有啲用剩嘅貓砂，一箱仔貓罐頭，係以前暫託阿Flo 同Bubble 時用剩的，仲有個全新嘅貓厠所

咁我哋食完飯就去阿Pat 度攞物資

當我哋攞啲物資返到屋企樓下，打開大廈大門，見到一隻西施狗行咗出o黎，但我望向狗狗身後、lobby 度唔見有人，即係唔見有狗主係附近

我先攞啲嘢返屋企，仔仔爸就留係lobby 睇實隻狗，順便睇吓有無人會落樓搵狗，但等咗好耐都唔見有人搵狗，其實當時都唔知點算，又唔可以唔理隻狗狗，嗰晚其實都幾凍，如果狗狗走咗出去係街過夜都幾難捱

我話不如問吓阿Pat 可唔可以帶狗狗去Shelter，仔仔爸就打電話比阿Pat ，問阿Pat 可唔可以收留狗狗一晚，第二日帶狗狗去Shelter，阿Pat 話佢可以帶狗狗去Shelter，但就唔可以收留狗狗一晚，咁唯有我哋帶狗狗返屋企過一晚，明天一早就帶狗狗比阿Pat

狗狗身上無狗味，尚算乾淨，但見佢啲毛好多都打咗結，尤其係對後腳，狗狗之前疴過屎，所以佢個pat pat 仲有屎，一入屋就放厠所洗pat pat 同洗手腳，手腳都好污糟

不過佢好乖，任我哋舞

困佢係厠所都咩點吠，都係有時吠一陣，開咗罐貓糧比佢佢唔食，以為佢唔鍾意食，仔仔爸又特登去買罐狗糧返o黎，但佢都係唔食，水就有飲少少

到第二朝都係唔肯食嘢，佢真係好乖好純，好鍾意人陪同鍾意人摸佢

返工前先帶佢去阿Pat 度，好彩之前仔仔爸買咗條貓帶，又啱身比佢用，佢一去街好開心呢

咁啱阿Pat 嗰日放假，可以帶狗狗去Shelter，咁我食完Lunch 就打比阿Pat 問佢帶咗狗狗去Shelter 未，阿Pat 話當佢帶住狗狗去Shelter時，仲差幾條街就到Shelter，經過間甲店，佢有個朋友係甲店做，見佢經過又帶住狗狗，以為佢幫Shelter 帶狗狗去散步，當阿Pat 同佢朋友講狗狗嘅事，佢即刻話不如比我養啦，佢自己都養過幾隻狗，依家屋企都仲有一隻，個朋友又好鍾意佢，所以阿Pat 決定交狗狗比朋友，不過之前我哋都有同阿Pat 講過，睇吓會唔會有人post 話唔見狗狗，如果有嘅話，就要交番比人

係甲店時影的

朋友帶咗佢返屋企

阿Pat 朋友想帶狗狗去睇醫生，但Boxing Day 診所唔開門，佢見狗狗污糟毛又打結，就帶佢去寵物美容剃晒佢啲毛同沖涼，剃晒啲毛見到佢隻腳瘀晒

Max 之前無咩點瞓，所以佢已經好攰呢，朋友老公話佢好黐人，好鍾意佢

當日我哋放工返屋企，係Lobby 已經見到有人post 話唔見狗狗，原來狗狗叫Max

咁我哋通知阿Pat ，阿Pat 又通知佢朋友，咁佢朋友就打電話比Max 主人，個電話號碼係Max 主人個仔，佢話唔見咗Max，佢媽媽好傷心，今日阿Pat 朋友已經交番Max 比主人個仔，佢個仔會帶狗狗返去比佢阿媽

狗主人因為年紀大，至無咁大能力打理Max 啲毛，但見Max 尚算乾淨，都唔係完全唔Take care 阿Max，阿Pat 朋友臨走前都叫佢好好Take care 阿Max

呢個都算係好好嘅結局，其實阿Max 咁乖，我唔係養咗咁多貓，我都想養埋佢