深水埗一日遊

呢日國慶補假，阿B 唔駛我湊，朝早同三家姐、姨甥仔去平台茶餐廳食早餐，可以過隔離買點心係茶餐廳度食

未到中午我就閃出街，搭地鐵返石硤尾行吓，我至細係石硤尾長大

經過我以前間中學

 去附近食我返香港第一碗車仔麵

我小時候住係白田上村

週圍去行吓睇吓，好多地方已經改建咗，都無o黎睇過

行返去娘家大坑東村，返去坐吓搵大哥攞啲嘢

之後行落深水埗，經過桂林街，去試吓好出名嘅合益泰腸粉，今日假期好鬼死多人

其實腸粉就一般，但啲麻醬就好好味，後來啲Facebook 友話因為落咗好多豬油，所以至咁好味，聽到真係嚇屎寶寶了

去西九龍中心行吓，幫阿姐搵啲小玩意

阿姐叫我幫佢搵啲有貓腳印嘅地毡，只搵到呢款

仲有呢啲小玩意

 約咗阿姐契爹個前女友出o黎聚吓，叫佢o黎西九龍中心Join 我，我哋去咗上海寶哥食擔擔麵

因為佢有朋友從元朗車佢出o黎，之後佢又跟番朋友車返元朗，所以食完個下午茶，好快就分道揚鑣

之後我就由鴨寮街經長沙灣道行出去太子，call 定另一個朋友去花園街Join 我

先行吓金魚街睇小動物

個Friend 終於o黎到，佢陪我行花園街，後來我哋去咗泰國人海南雞食晚飯，佢請我食飯話同我補祝生日

呢個朋友，真係識咗好多年，佢係我小學同學個妹，自細一齊係小童群益會玩大，雖然呢個朋友以前都唔係成日見，但每次見都好多嘢傾，咁啱呢個朋友當時放緊傷假，如果我有地方想去，佢都可以陪我去，可惜我要湊住個衰妹，搞到我邊度都無得去，嗚鳴

另一日，要繼續湊B，佢第一次疴屎比我嘆，臭到想嘔呀，差啲連件蛋治都嘔番出o黎呀，救命呀

嗰晚又係等埋姨甥女放工，去荃灣食雞煲，我哋都唔食得辣，但呢個我哋叫咗少麻少辣，味道都好好喎，後來加水叫咗少少嘢o黎打邊爐