中秋節

中秋節當日，要繼續湊B，不過當日三家姐好早就收工返o黎，我哋先去附近食咗個下午茶，再落楊屋道街市，買咗啲菜同生果，返屋企今晚做節

仲買咗炯記手撕雞

三家姐一早係樓下大快活訂咗個盤菜，開罐鮑魚，滾啲菜

姨甥女收工時買咗甜品返o黎食

之後我哋落樓下賞月，我都已經有廿幾年無係香港過中秋，真係好有氣氛

不過後來又落雨，移入去啲有瓦遮頭嘅地方

另一日又跟三家姐去開工，今次係去西灣河，近太安樓附近

三家姐話太安樓入邊啲車仔麵同海南雞飯又平又好食，我哋就先買上去食

 有人放龜散步

三家姐呢個客養咗三隻貓，所以除咗要清潔之外，仲要餵貓貓

呢隻黑白異短已經超過十歲，佢唔怕人

之前我姨甥女話驚啲貓會抓到阿B，我話儍啦，我驚阿B 整親人哋啲貓就真啦，我係唔會比阿B 攪到啲貓，我錫貓多過錫阿B  呀

今次阿B 無阻住三家做嘢，所以我唔駛幫手，剩係睇實阿B 就得了

另外嗰兩隻貓就比較怕人，兩隻都匿咗係張按摩椅後面

做完嘢，貓主人係寵物店訂咗貓砂，我哋要去攞，不過去攞之前，我哋係附近週圍行吓，去附近食豆腐花

去寵物店攞貓砂時，店主有兩隻貴婦狗

返上樓見到其中一隻英短貓走咗出o黎，後來仲比我摸

另一隻好怕人，一聽到我哋返o黎，又即刻匿番入張按摩椅後面

臨走前再清多次砂盤，再幫貓貓添多啲貓糧至走

之後搭地鐵返荃灣，去千色滙幫阿B 換過隻零食

今晚追月呢

另一日又係湊阿B，當日等三家姐收工返o黎，就一齊去九龍灣我個妹做嗰間稻香食飯，因為我二家姐個女一家聽日就飛返澳洲，所以同埋二家姐、姐夫一齊再食餐farewell 飯，都唔知下次係幾多年之後至再見面

當日稻香啲阿拉斯加蟹做特價，$9.8一兩，好抵食，都好好肉

之後嗰日星期六，姨甥女放假，但三家姐要開工，朝早我又自已落樓下食粥，當然又係豬紅魚片粥

下午我哋約好二嫂入屯門拜祭我父母，我同姨甥女坐巴士入去，三家姐收工會入去join 我哋，當我哋去到良景村時，三家姐都已經到咗，仲已經join 埋我二嫂

良景街市新裝修，有好多嘢食

我哋係街市買咗啲生果去拜祭，姨甥女買咗啲嘢上我二嫂屋企食，我姨甥女留係度湊阿B

我同三家姐、二嫂就行去青松仙苑，仲約咗我侄女，去到時佢已經到咗

 以前o黎拜祭父母時，經過附近都知道有流浪貓，當日都發現一隻

有餵貓人幫流浪貓準備開餐嘅地方，好週到

行返二嫂屋企途中，二嫂帶我去附近啲商塲仔度行吓，仲特登帶我o黎呢間寵物店睇貓貓呢

之前二嫂帶咗Bear Bear 去寵物店度沖涼，我哋行完商塲就去寵物店接番Bear Bear

寵物店隻店長Chow Chow 阿雲，好得意呢

當晚我哋係良景商場某酒樓食晚飯，侄女約咗佢未婚夫出o黎同我見面，佢哋出年就結婚，呢餐多謝未來侄女婿呢