阿姐今日就返新工，阿姐先會返嚟紐約Training 幾個星期，阿姐有個年紀比較大嘅同事，好錫阿姐，當阿姐係女咁，所以見阿姐就嚟走，前日搵阿姐食Lunch，咁老同事叫阿姐帶埋狗狗出嚟食飯，之前講過阿姐只會帶Rocky 一隻出街，一來Rose 唔鍾意出街，二來阿姐都驚自己handle 唔到兩隻大狗，但老同事之前都養過大狗，佢話可以幫手睇住
難得Rose 又肯跟阿姐出街
先帶2R 去老同事屋企附近放吓電先
2R 玩得好開心呢
阿姐話康州因為疫情都有啲緊張，啲餐館都開始收緊， 咁阿姐話不如去老同事屋企食飯，2R 一去到人哋屋企，先比水2R 飲
咁啱老同事個女因為感恩節，返咗去同父母慶祝，阿姐話Rocky 走埋去靚女度比靚女摸，一臉得戚，哈哈
老同事個太太都好鍾意呀姐，佢行街見到呢樣嘢就諗起阿姐，所以買咗嚟送比佢
阿姐尋日返嚟紐約，但佢先搵咗個朋友食飯，食埋糖水至返屋企，佢買咗個芋圓甜品比我食
今年十月初就已經開始比較涼，但Building 又無咁快有暖氣，所以要攞張毛毡出嚟，係廳睇電視時保暖，張毛毡一出，屋企嗰三隻最重嘅貓就成日嚟黐住
Mango 仔霸唔到我個大髀位，點都要黐住張毛毡
瞓到咀郁郁
佢一見我舖張毛毡上大髀，就即刻跳上嚟
平時Marble 仔唔會走上貓樹，但佢見到我個大髀位比Mango 仔霸咗，就死死氣走上貓樹位好慘咁昅住
Marble 仔仲好精，夜晚仔仔爸會開電暖爐瞓，佢就走上床暖暖爐
奇哥佢呢就唔鍾意瞓毛毡，佢每次想黐我，但見我冚住毛毡，佢只會瞓係旁邊，係毛毡度搓手手
而Minnie 佢本身都唔會走上梳化，呢排凍咗，早晚佢就返房張電腦椅度瞓
見到呢張相，其實證明Marble 仔都未必係為咗張毛毡至黐我，佢真心想黐住阿娘我
天氣一凍，天師仔就成日打乞痴，驚佢會冷親，一見佢瞓覺就幫佢冚毡，但佢不嬲都唔鍾意冚被，一冚咗佢又好快走番出嚟，情願瞓地下
呢幾日天師仔又狂打乞痴、流鼻水、又鼻塞，上次睇完醫生打咗枝針，已經好轉，一再凍番就番發，尋晚同今朝佢仲唔肯食嘢、飲水，只鍾意飲罐頭汁同雞汁，又要約時間帶佢睇醫生，每年天氣一轉凍，天師仔就會咁，我本身又怕凍，真係好唔鍾意冬天
