散散心

自從Marble 仔走咗之後，長時間係屋企，又睹物思貓，都好辛苦，所以就算唔需要去買餸，我每一日都會特登出去行吓

呢日我去行屋村後面East River 河旁邊，Highway 橋底，平時好少會行，每次揸車經過，因為呢度有健身設施、休憩地方，成日見好多年紀大嘅人仕享用

就係我個屋村停車場對面

遠望雙橋，Brooklyn Bridge

Manhattan Bridge

身處橋底又唔曬，又有風，都好舒服

 

好多人係度釣魚

健身設施、休憩區

有籃球場

成日都有呢班Anut、uncle 係度跳“老舞”，佢哋好自得其樂

上個星期日，阿姐話同男友仔揸車返嚟紐約Queens 行街，男友仔要行Game shop，之前阿姐契媽話好耐無見阿姐，近排紐約啲食肆開番堂食，可以聚吓，加上阿姐依家呢份新工，係契媽個仔介紹，我話要阿姐請契媽、契哥食番餐，所以阿姐呢次返嚟，就順便約埋食呢餐

Queens 最多就係韓國餐廳，契媽又好少食韓餐，所以阿姐揀咗呢間

嗰日食完飯，阿姐返到屋企，send 報平安相，唔係2R、2S，而係男友仔媽咪隻狗

尋日我又落街行下，遇見幾隻舖頭貓

西藥房Batman

呢隻係菜檔貓，肥版天師仔，係早排見到，當時同佢玩緊嘅時候，有對couple 咁啱拖狗行過，阿肥版天師仔見到隻狗，走埋去打人隻狗，仲想追住嚟打，真係笑屎我

每日落街行吓，心情又好好多，又唔駛長時間係屋企睹物思貓，不過其實呢，有時行吓行吓諗起Marble 仔，依然會眼濕濕，知道一時係會好難忘記個寶貝仔，依家唯有靠時間慢慢溝淡對佢嘅思念

無邊的思憶

屋企少咗隻貓，感覺真係好唔一樣，成屋都有佢嘅身影，Marble 仔臨走前幾日嘅相片

成日擺出天真無邪嘅樣子，應該係佢覺得好唔舒服

有時佢無匿埋，我就哄佢上梳化陪我

以後開飯時，唔駛再提防有貓會上枱偷餸食

整貓早晚餐，只有六碟，又再無貓幫手舔罐頭蓋掩啲汁汁

以前有天師仔、Marble 仔、Mango 仔食雞胸肉，至從天師仔有病就開始唔食，依家得番Mango 仔食，食埋呢舊雞，就唔再整，同其他貓地一齊食罐頭

Mango 仔又無得再偷食隔離Marble 仔啲雞肉，我又會諗起派餐時，Marble 仔好緊張會叫嘅聲音

無咗Marble 仔幫手清其他貓啲手口尾，比晒Mango 仔食，實肥屎佢

水機底張墊可以唔駛再墊，因為Marble 仔飲水前好鍾意用手潑水落地，張墊又可以比佢印吓手仔啲水

以後再執唔到屬於Marble 仔嘅鬚了

見到啲貓砂，就會諗起佢隻手腳成日帶啲貓砂週屋都係

行過呢度就會諗番佢係診所嘅情境 (診所附近)

Marble 仔以前最鍾意瞓梳化，呢張墊都係為佢而設，依家我已經收起咗 

其他貓地都好乖，週不時會上梳化陪住我

尤其係Charco 仔，其實佢平時比較少瞓梳化

我坐埋佢身邊佢都唔走

我諗其實佢哋都感受到屋企少咗隻貓，Marble 仔走咗之後，我發覺天師仔唔再入房瞓，佢平時下午會瞓係灰色張地墊度，而Marble 仔會瞓後面嗰兩張貓床

依家天師仔會匿入衣櫃瞓，夜晚佢情願瞓厠所都唔入房瞓

以後我臨瞓前數貓，只可以數六隻，其實要睹物思貓，感覺真係好唔好受，知道連貓地都感受得到，我更加心痛