再見Marble仔

真係無諗過會係Marble 仔先離開我，仲要親手送佢走

之前睇完醫生返嚟，一直留意住佢，照超聲波時剃咗肚仔啲毛

佢仍然仲係成日出出入入厠所疴尿，又成日飲水

發覺佢越食越少，除咗罐頭糧，見佢開始無主動去食乾糧，唯有比啲“粒粒”佢，佢會肯食少少，後來連粒粒都唔食，再加啲treats 至食多幾粒，後來佢只揀treats 食

開始成日匿埋瞓覺

直至最後佢連treats 都唔想食，留意到佢已經多日無大便，見佢係砂盤好想大便，但佢又疴唔到，星期一即刻叫阿姐打去診所同醫生傾吓，醫生叫我即刻帶佢去睇，不過估唔到，佢踏入診所之後，就無得再返屋企

磅重時，佢剩番11磅幾，短短兩個星期已經輕咗好多

醫生要同佢照X-ray，呢張係之前照超聲波片，顯示佢個膀光有啲嘢

呢日X-ray 顯示佢個膀胱，脹大咗好多，係佢啲小便排唔出，而且脹大咗咁多，壓住啲腸，令佢排唔到大便，之前見佢行路“拮吓拮吓”，後腿又無咩力、又腳震，應該就係因為個膀胱脹大，墜住下身

醫生話唯一可以做就係幫佢抽小便，但佢永遠自己排唔清小便都係一個問題，既然係咁，佢建議送佢走，打電話同仔仔爸商量，仔仔爸一直都主張唔要貓地辛苦，都知道呢個係好難好傷心痛苦嘅決定

決定咗之後，醫生畀我同佢獨處咗一段時間，畀我餵佢食最後的零食

睇，個樣仲係好天真可愛

平時我都好少抱貓，最後我抱咗佢一陣，錫吓佢，呢張係同Marble 仔最後嘅合照

之後醫生帶咗佢去插導管，我唯有搵隻診所貓，溝淡一吓傷心嘅情緒

醫生帶番Marble 仔入嚟，又畀時間我同佢獨處，之後醫生就入嚟同佢打藥水

我一邊叫住佢個名，同佢講再見，睇住佢慢慢合埋眼，真係好心痛

之後醫生再次畀我陪吓佢，Message 阿姐同仔仔爸知，Marble 仔已經走咗，我摸住佢身體仍然係暖的

陪咗佢一陣，仲未有人入嚟帶Marble 仔出去，但我真係頂唔順，我要求要走，我忍住淚水，帶住個無貓嘅貓袋行返屋企

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

“寫我心情 ”

大家怕的話，可以skip 咗唔睇，我只係想記住當時嘅心情，怕將來會唔記得，將來睇番，回憶番，不過知道一定會勾起傷痛

決定送走Marble 仔，醫生問我想唔想一直陪住佢，當時第一個念頭真係唔想睇住佢走，但又怕之後自己會後悔，會覺得有遺憾，唯有忍住痛睇住佢走

返到屋企，入屋見到其他貓地，我同貓地講，Marble 仔已經走咗，以後都再見唔到佢

我開始清Marble 仔嘅嘢，用刷刷走Marble 仔瞓開舖滿咗佢啲貓毛嘅貓床，同被面上嘅貓毛

整貓晚餐時，收起佢個貓碟

我照常煮晚餐，但我一啲胃口都無，只叫仔仔爸食，飯後我繼續開電視劇睇，睇住“大叔的愛”，睇住劇時，令我可以暫時唔會諗起Marble 仔

但到夜晚，我真係瞓唔著，腦裡面一直諗起Marble 仔，當時天師仔都仲未瞓，佢好鍾意引人入厠所討摸、拍pat pat，我就坐係地下一邊拍住天師仔個pat pat ，一邊諗住Marble 仔，一邊流眼淚，其實我可以再開電視睇，但我又唔想咁做，最後上床都係流住眼淚瞓

到第二朝，我好早就醒咗，瞓唔番，餵完貓地食早餐，到我自己整早餐食，我都仲係無咩胃口，只沖咗杯咖啡，食咗幾片麥方包，平時我食完早餐，就開始掃地，如果覺得地下多污積，我仲會抺吓地，我如常去掃地同全屋抺咗一次地，感覺好想掃走晒、抺走晒Marble 仔啲毛髮同氣味，不過我知道，就算無晒佢嘅毛髮同氣味，我仍然會記得佢嘅身影

腦裡面成日響起呢隻歌、呢句歌詞“分離從來不易”，我真係好唔捨得佢，好掛住佢