另一心痛事

除咗Marble 仔有病，其實仲有一隻，就係天師仔，繼年頭睇醫生，再次食消炎藥都唔好，後來佢打乞痴仲打出血，真係嚇死我

即刻帶佢去睇醫生，醫水話要照CT Scan，但診所無得照，介紹我哋去大型醫院照，Stacy 話有間寵物醫院好好，但約時間要兩個星期後，診所介紹嗰間可以約得早啲，所以就約咗診所介紹嗰間

阿姐唔得閒返嚟陪我帶天師仔去，Stacy 佢好好，特登請假陪我去，我哋只可以係門口交低，再等醫生call 至知道咩情況

之後我哋係醫院附近度行吓，見到個舖頭入面放咗隻貓咕o臣，好得意，見到我即刻諗起Mango 仔

接到醫生電話，先同我哋講照CT scan 嘅費用，會照啲咩，同意咗至幫我哋做， 會抽埋組織去化驗，我哋同意咗，之後先返屋企，因為要麻醉，又要等佢醒，無咁快可以接佢走，到接到電話可以接佢，都差唔多仔仔爸放工，一於等仔仔爸收工接埋我至一齊去接天師仔，要差唔多一星期至有化驗結果

佢一返到屋企好尿急，即刻去厠所，仲好肚餓，我留定罐頭比佢，佢即刻有得食

醫生只比咗啲雲南白藥比佢“UP”鼻止血，估唔到老番都會用唐人藥物，醫院收我幾十蚊，係唐人街藥房買就十蚊都唔駛

佢成日匿係自己間房度

之後佢都有其他地方瞓，佢多數上床瞓覺，原本醫生叫我哋比佢帶一星期頭罩，但佢成日整甩，就由得佢

佢胃口都算唔錯，等我比嘢食

最後化驗結果係鼻腔裡面有cancer

仍然間中有噴鼻血

我哋再約咗Stacy 介紹嗰間醫生再做檢查，因為嗰間醫院專醫癌症，我哋先send 番之前個化驗報告去呢間醫院

今次阿姐返嚟同我帶佢去睇，醫生只同佢檢查吓，同睇佢個CT scan、化驗報告

話佢需要再做多一次CT scan，要做五次化療，可以keep 到大約一年命，費用大約15k，但呢個價錢，我哋真係負擔唔到，之後可能仲要睇醫生，所以我哋決定唔做

我哋覺得啲雲南白藥都無咩功效，我哋轉咗比靈芝粉佢早晚食

佢食咗靈芝粉之後，噴鼻血少咗，但仍然成日打乞痴，會流分泌物，依家都過咗差不多半年，我覺得佢keep 得好好，嗰陣佢成日匿係衣櫃裡面

依家成日都會出嚟，可能天氣又熱咗

佢精神好好，又肯玩吓

雖然佢仍然鼻有分泌物，見佢肯食，有大小便，肯玩，仲會討人摸佢，噴血都少咗好多，今次出post，我一邊寫都一邊好心痛，知道佢生命係倒數緊，但我會好好珍惜呢啲時間同佢相處