開片連環睇

隻衰仔Charco又試撩交打

您哋估唔估到個結局會係咁呢


 

貓毛處處

各位都見識過Charco仔係幾咁惡屎，但我好唔明白，點解當初天師仔o黎到，佢只有比天師係打，仲打到叫救晒命

不過慢慢開始就無咁怕天師仔，由天師行過佢身邊時，一巴打埋去，但每次天師仔比Charco仔打完都唔會還手，只會行開

直到依家就真係今時唔同往日，仲係Charco仔成日去蝦人，有時佢會詐詐帝帝去嗅人條頸，之後就一嘢咬落去，連仔仔爸都話佢好狠，好似啲獅子、老虎咁，專咬頸

由佢哋你追我逐開始

跟住開始去郁人

再打埋一堆

有時天師仔都怕鬼咗佢

但有時又比天師仔兇番Charco仔轉頭喎

睇，每次佢哋打完交都係貓毛處處

仲見到佢哋從對方身上咬甩、抓出o既毛

我每日都要掃大量o既毛

不過有時天師仔好無辜，其實係Charco仔比我哋攪興咗，但又咬唔到我哋，咁啱天師仔又行過，佢就一嘢撲埋去咬天師仔o黎出氣，天師仔真係好對唔住

天師的睡房

近排發覺走廊啲入牆櫃門，成日都無故打開咗，原來係天師仔自己開o既

天師仔都係比較鍾意入近我房門口呢個入牆櫃

Charco仔見到就唔抵得，係度發爛渣

後來天師仔都肯教Charco仔點樣開櫃門

不過個衰仔學極都唔識

天師仔佢依家好多時下午、夜晚都會自己開門走入去瞓，有時阿姐唔見天師仔，會問我佢去咗邊，我一見個櫃門開咗，我就會話佢返咗自己房瞓，唔好嘈住佢

咁阿姐就幫天師仔整咗以下呢樣嘢

阿姐仲要搵天師仔同佢間房影番張相o忝

呢個阿姐都幾鬼儍，但又儍得好可愛

一時天堂、一時地獄

我成日都講Charco仔好衰，唔鍾意比人摸，摸多兩嘢就咬人，其實都唔係o既，間中佢心情靚都會比我摸耐啲o既

好似以下呢條片，我好多時坐係餐枱度睇報紙呀、小說呀、食吓嘢呀咁，佢都會自己走上o黎嗲吓我，用個頭仔“high”我額頭呀、面面呀咁

都幾冧o架，真係佢冧時我又冧

再睇吓

不過話口未完就...

但呢位少爺一唔高興就...

仲有呀、仲有呀

咁您哋話呀，係咪好大極端呢

愛上書包

天師仔佢好鍾意阿姐個返學書包，成日坐埋去癡住

一見個書包瞓低咗，就會即刻坐上去

仲攬到實，趕都唔走

仲瞓埋覺o忝

都瞓得好冧吓

Charco仔又唔抵得，一見佢行開咗，又走埋霸埋一份

又係鍾意癡埋啲黑色嘢度，又係想我哋睇佢哋唔到

其實天師仔係好鍾意墊住啲嘢o黎坐，佢連我個返工袋都唔放過

連隻咁細隻o既拖鞋都唔放過

有時放張紙係地下，佢都要坐上去，但Charco仔又唔會咁嗰喎