貓友、狗友聚

呢個星期我比較自由啲，除咗星期一要湊阿B，下午細妹休息做完針灸，順便買埋車仔麵返o黎比我頂肚，等埋三家姐放工返o黎，再一齊搭巴士入沙田，約咗我阿姨一家食晚飯，自從爹娘唔係度，得番阿姨最親，每次返香港一定會去探望孝順阿姨

第二日，細妹續繼休息，咁阿B就留番比佢湊，今日嘅節目就係約咗貓友食飯，佢哋知道我返咗香港，約我出o黎聚吓，咁比面，當然點都要抽時間出o黎啦

仲分咗下午、晚餐兩場，首先約個貓友係太子食過遲Lunch，去咗一間叫“小田田”，好有田園風嘅餐廳，呢位貓友曾經兩次o黎紐約出Trip，都有o黎我屋企探過貓，上次返香港時都有約過出o黎食Lunch

只得短短相聚一小時 ，貓友要趕返去教學，因為夜晚嗰餐都係約咗係太子始創中心食，無理由返荃灣之後再返出o黎，所以我又行去深水埗，去西九龍中心再行吓

約咗兩位貓友始創中心食上海嘢，其實我上次返香港，都係同佢哋同樣約呢間食，不過上次就有阿姐係度，仲嫌傾唔夠，仲去咗麥當奴飲咖啡繼續傾

食完貓友話叫甜品食，我話想食反沙芋，原來反沙芋係潮州菜式o黎，後來我哋揀咗高力豆沙，其實我都係第一次食，好味

另一日，三家姐唔駛開工，先同三家姐帶埋阿B落茶餐廳食早餐，係回鍋肉麵呀，我以前好鍾意食回鍋肉裡面啲筍o架

中午我搭地鐵去中環再轉船入南丫島，約咗個住係南丫島嘅Blog 友

 呢位Blog 友佢無養貓，佢係養狗，佢帶埋佢隻狗湯圓o黎碼頭接我

湯圓媽先帶我去“南丫島動物保護組織”，因為我攞咗啲嘢捐比佢哋義買，我仲幫襯佢哋買咗啲貓貓杜蟲藥

原本湯圓媽想同我o黎呢間餐廳食Lunch，因為呢間餐廳可以帶埋狗狗去，不過無開門，唔知係唔係閒日唔營業呢

所以唯有先帶湯圓返屋企，順道坐吓參觀吓，湯圓都有成十歲，我原先以為佢係一隻熱情嘅狗狗，原來唔係，原本湯圓媽仲有隻黑色唐狗芝麻，但舊年年尾已經去咗彩虹橋做小天使，都等唔到我呢個姨姨o黎探佢

之後湯圓媽帶咗我去一間餐廳食嘢

湯圓媽係2010年時，自費出咗一本“土狗不土”，寫出幾個養唐狗家庭嘅故事，包括佢自己早期養但已經去咗彩虹橋嘅唐狗豆點，本書最主要係道出，唐狗雖然外貎無名種犬咁討好，但唐狗都有其獨特嘅性格，呢本書所買出嘅款項，係全數捐出比啲毛小孩的，好有意義

湯圓媽就送我去碼頭搭船，我返到三家姐屋企，等埋姨甥女放工返o黎就去附近食晚飯

又另一日，姨甥女要去睇醫生無返工，帶埋阿B 陪佢去睇醫生都無再出去，我都係去買外賣返去一齊食，當日三家姐好早收工，所以約三家姐係樓下馬仔記食雲吞麵下午茶，返咗香港差唔多成個月，都係第一次食雲吞麵

當晚我又約咗另一個貓友飯聚，呢個貓友我都係第一次見，係已經有對仔女嘅靚女人妻o黎，佢又係知道我返咗香港，要求聚吓，靚女人妻係旺角返工，所以約咗係新世紀廣塲等，搵嘢食時，我見到有間百樂潮州酒家，話想食反沙芋，貓友都話未食過，所以問咗佢哋有無呢個甜品至入去食

都幾好食，又唔太過甜，不過我係電視上見到嗰啲好似比較黐黐的，係咪呢﹖

食完飯，我打電話問姨甥女話我係旺角，有無嘢想食我可以買番o黎，佢就叫我去朗豪坊滿記買榴槤班戟

阿B  係為食妹o黎，我比咗少少榴槤肉佢食，佢食完即刻走開，真係笑死我

到星期五呢一日，三家姐唔駛開工，但我就約咗個貓友係荔枝角等，上次我返香港時，只同佢食過Lunch，所以約定今次返香港要去探佢啲貓貓

佢先帶我去食豆漿粢飯做早點

之後佢帶我搭巴士去佢屋企探佢啲貓貓

前面嗰隻係金金，後面嗰隻係旺旺，其實我覺得兩貓好相似，有啲難分

呢隻係已經十五歲嘅阿花

呢隻係阿寶，比較怕人

最後阿花、阿寶都比我摸摸，好乖呢

影到四隻齊貓

貓友下午已經約咗人，所以我要走了

待續......