Hugo 仔敏感糧體驗 + 食魚魚

10月嗰陣Hugo 仔肚疴，佢食完個療程藥之後就好番，不過仍然係疴軟便，我講過特登訂咗啲腸胃敏感糧返嚟畀佢試吓食，睇對佢有無幫助，不過啲敏感糧仲未送到嚟時，我請教過依家仲讀緊獸醫，阿姐個M 表妹，問佢有無咩可以幫到佢，咁M 表妹教話試吓煮雞飯，咁特登買雞胸肉蒸熟再撈飯畀佢食

佢都肯食，不過唔食得多

反而黑糖仔就好鍾意食，見Hugo 仔麻麻地鍾意食就無再整畀佢食，而且都係疴軟便

啲敏感糧終於送到嚟，有乾糧同罐頭

初初佢好鍾意食，可能係新口味啦，但食咗幾次就唔再鍾意食

依家唯有一見佢走堆個兜度食乾糧嗰陣，就放啲敏感糧溝埋啲普通乾糧迫佢食，不過佢好鬼精，會唔食食隔離嗰兜，所以每次都要攞走附近啲兜，佢無得食其他就唯有照食，我仲要睇實佢食，而其他貓又好想食啲敏感糧，無得食就反而好想食，其他貓見佢食完行開，就會埋去執死雞

雖然佢唔係完全食敏感糧，但見佢啲便便都開始有好轉，無肚仔唔舒服，心情靚靚，都多啲黐人

伸脷仔，So cute

直到近排，佢啲便便已經好靚，不過佢疴啲便便真係好鬼臭，每次一嗅到大便味，就知係佢去疴臭臭

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

仔仔爸怕腥所以比較少買魚返嚟食，咁啲新鮮游水魚佢都會食嘅，某日佢買咗條側魚返嚟食，佢先砌部份出嚟蒸畀啲貓地食

最後得Chewy 鍾意食，所以話貓唔一定鍾意食魚

佢哋唔鍾意食仲好，咁唔駛分畀貓地食，我可以食多啲，哈哈

Chewy入室九週年

今日係靚女Chewy 入室九週年，又講吓佢嘅來歷先，佢係阿姐某一個前男友家後yard 其中一隻嘅流浪貓，阿姐呢位前男友都幾有愛心，會餵佢哋，阿姐就係貪圖Chewy 嘅美色，用罐頭引佢入籠帶咗佢返嚟屋企，睇，嗰陣佢係前男友家，佢會係窗前等食

嗰陣屋企四隻都係囝囝，我恨有隻貓女，阿姐就帶咗隻貓女返嚟，仲要咁靚女，後來阿姐搬番去康州同舊男友同居，問過我有無唔捨得Chewy，我話梗係唔捨得啦，所以佢就無帶Chewy 走，自己再領養貓貓，最後佢就領養咗Macy、Mitten 倆母女

Chewy 初初嚟到我屋企時

佢係隻怕羞貓，不過都好快熟悉我哋，開始入廚房等食

越嚟越靚女，佢鍾意玩Laser Point，佢會入我房坐定定望住我，想我攞Laser Point 出嚟同佢玩

嗰陣佢都幾百厭

佢同奇哥好friend，奇哥好錫佢，成日同佢舔毛，奇哥唔係度，唔知佢有無掛住奇哥呢

近排佢嗲咗好多，夜晚跳上床要人摸佢，仲要瞓係我心口要摸，唔知係咪因為無咗奇哥，而且佢同其他貓地又唔夾

計落佢都應該over 十歲，佢除咗幾年前剝過12 隻牙，一直佢都好健康，每日兩次濕糧都會食晒，雖然胃口咁好，都仲係keep 住咁窈窕，希望佢繼續健健康康可以陪住我哋多十數年

Mango仔睇醫生

上個星期一早上，發現Mango 仔多次出入砂盤，見佢啱啱疴完，又即刻去其他砂盤再疴，見佢連續幾次都係只疴咗幾滴

之前留意到啲貓Case，話啲貓成日出出入入砂盤，疴唔出尿，有時係屎道炎，嚴重啲會係腎石、尿結石，會有生命危險，所以我哋都唔敢怠慢，即刻book 診所帶佢去睇醫生

仲未夠鐘出門口，見Mango 仔係個架上面瞓覺，仔仔爸話佢係上面點放佢入貓袋，我話用零食引佢囉，好easy，當我換好衫，攞咗個貓袋放係地下，我去攞褸時，轉頭已經見佢自己走咗入個貓袋度，哈哈

好彩呢日仔仔爸無工開，唔係又要我揹住呢隻肥貓行去診所，佢一路行、一路叫

磅重7.幾Kg，都有16 磅，比起以前佢輕咗呢

等藥期間，見前枱放咗啲treats，畀佢佢唔食

醫生照過話無結石，要驗尿先知係咪有炎症，醫生見佢咁多年無check up，順便抽血驗吓，開咗隻消炎藥，醫生仲話如果有壓力，貓咪都會有問題，所以另外開咗隻舒緩藥畀佢

返到屋企佢好攰就瞓，啲藥要飽肚食

佢食咗藥又去瞓，啲藥話食咗會眼瞓

佢除咗尿頻，其他嘢都好正常

佢最叻係食藥，啲藥水撈埋啲罐頭度又食，啲藥丸加啲雞乾一齊，佢又食埋，佢真係好鍾意食雞，而且唔通啲藥唔苦﹖

佢個驗血報告好靚仔，驗尿又無發現有炎症，醫生再追加一個種菌嘅尿test，初時食咗5 日藥都唔見有好轉，到咗第六日至見佢好番好多，起碼無成日出入厠所，只係之前2 日佢疴爛便，唔知係咪啲藥嘅副作用，最後連個種菌test，都無問題

開始見到佢小便大篤番，正常番好多

佢除咗尿頻，仍然係好為食，又嚟昅住我開餐，等開罐罐時，又同啲細佬玩

知道貓地飲水少，佢哋好容易有病，所以除咗水機，我哋都週圍放多啲水畀佢哋飲

暫時Mango 仔應該算係好番，希望啲寶貝健康啲啦，唔好成日嚇親阿爹阿娘