天師的生活

由我抱咗天師仔入家門開始，隻衰豬都無再坐過我個大髀，初初坐係梳化，拍吓張梳化，佢都會跳上o黎，瞓係度，比我攬住，陪我睇電視，但呢排佢都唔睬我，不過尋晚，同佢玩玩吓，佢又自己跳上o黎瞓係我旁邊比我摸住

仔仔爸話︰妳之前講到天師鍾意坐大髀，又咁，又咁，咁點解妳所講o既優點依家無晒o既
我就話︰咁除咗唔坐大髀之外，佢都無物其他唔好，又肯比人癡，點都好過個衰仔Charco

（我要講明呢張爛鬼梳化，唔係佢哋倆隻嘢做o既，Charco仔自細都無去抓過張梳化，當天師想抓梳化、櫈時，我哋say no，講咗幾次，佢就無再去抓，佢去抓可以抓啲嘢，見我哋唔出聲，佢就知道係可以用o黎抓抓，佢真係好叻仔）

雖然佢有時唔會主動癡人，但佢一啲都唔抗拒比人癡住佢

其實天師係一隻好鍾意人摸o既貓，鍾意摸頭、摸下巴

佢肚肚啲毛好軟熟o架，仲點武都得

其實我好鍾意比貓貓對腳踢踢踢，好得意o架，佢仲會咬吓我，但係佢只會輕輕力咬，唔似得Charco仔咁搏命咬，見唔見到我隻手啲傷痕，全部都係個衰仔啲傑作

早排夜晚佢鍾意瞓我奶奶張床，最抵死佢連我奶奶返咗o黎，佢半夜都走上我奶奶張床度瞓，最後比奶奶發現就梗係比我奶奶趕走喇，呢張相係半夜三更阿姐起身影到o既

近期佢鍾意跳上床褥頂上面瞓

瞓到半夜，我去“疴o殊o殊”佢都會陪住我，要我摸佢，呢幾晚，佢陪我去完厠所，仲跳埋上床陪我瞓添

所以好多時我行入厠所佢都會跟埋入o黎，朝早仔仔爸起身佢都會跟住仔仔爸入厠所要摸摸

除咗要仔仔爸摸摸之外，其實佢想人同佢玩…

佢鍾意瞓我張床，由其阿姐係度，好似陪緊阿姐咁

除咗陪阿姐，佢都會陪我上網，雖然佢阻鬼住晒，但係我鍾意

前日紐約得華氐19度，尋晚得攝氐-2度，即係華氐27度，依家出面仲落緊雪，好似話會有6-8吋雪，好彩帶咗天師仔返屋企，唔係都唔知佢捱唔捱得住，見到佢依家瞓得咁安樂，我真係好開心，佢以後唔駛再捱冷，我又唔駛擔心佢

願天下o既街貓，可以好似天師咁，得到有愛心人帶番屋企愛錫，未有家的希望佢哋搵到保暖o既地方，捱過每一個寒冷o既冬天