颶風逃難記

一直係度諗，好唔好出呢篇卜，因為都已經係幾個禮拜之前o既事，而且當時又係facebook上已轉述過呢件事，不過覺得無facebook o既卜友，可能想睇吓當時兩隻仔o既情況，又當係喺呢度記載呢件事，將來摷番出o黎回憶吓

係8月25號，美國東岸有一個颶風Irene，將會吹到o黎紐約呢邊，仲話呢個風非常之強勁

係8月26號朝，除咗天氣有少少陰，有少少悶熱外，都仲未有風同雨，所以我都決定返工，但到咗10點幾，老闆都話早啲關舖走人

返到屋企無耐，就聽到宣怖正午12點，所有交通工具都會停駛，因為我住政府樓宇，呢條村又建築係East River旁邊，怕風力太勁，會引致河水暴漲或其他o既危險

中午，有屋村職員逐家逐戶，要求各住戶要撤離，同時詢問各住戶會否撤離
如果唔打算撤離，再寫底聯絡電話號碼，如無其他地方撒離，仲安排咗一間高中學校做避難所，仲僱用好多學校巴士o黎接載需要去避難所o既居民

但我住嗰楝大廈又唔接近東河，所以我哋決定留係屋企，亦都己經一早準備所有用品

如糧食、電筒等等o既防難措施，直至下午三點，又有唐人義工拍門派傳單

話5點後將會斷水、斷煤、斷電，原本仔仔爸都係決定留係屋企，但我奶奶就比較緊張，所以最後我哋一家執齊包袱，去我小叔屋企留宿，當然我哋唔會丟低Charco仔同天師仔啦

去到我小叔屋企，就安置兩隻仔去Basement，個Basement放咗好多雜物

但房裡有床，已經有枕頭、被舖，同時我掃乾淨個地下

Charco仔放出o黎後，一直匿係床下底唔肯出o黎

最初天師仔都有匿係床底，但好快不敵佢自己o既好奇心，就走出o黎四圍走動，後來要格硬抱Charco仔出o黎放上床，但佢都仲係好驚唔敢郁，又唔肯食嘢

當我哋上樓食完飯返落o黎，見Charco仔都仲未放鬆

佢好想瞓覺，但又唔肯放鬆，一聽到外面有風吹草動，就抬頭望吓，仔仔爸攞啲糧餵佢，佢都只係食咗少少

我同阿姐一沖完涼，就返落去陪佢哋，阿姐攬住Charco仔，佢就慢慢開始放鬆，開始瞓覺

而天師仔就掛住週圍八，點都唔肯瞓，後來佢都係上床hea咗一陣

係Basement又無電視，部Notebook又俾仔仔爸霸住，所以我倆母女就早早上床瞓覺，到咗半夜兩點，Charco仔就開始走落地週圍八卦，但都仲未肯自己食嘢、飲水，到最後至疴咗一次便便

佢仲跳上啲雜物度，走上窗台，天師仔見佢走上窗台，佢又跳埋上去，仲要霸咗o忝

Charco仔八完之後，就跳番上床，好似又驚番咁，都無再落過地

朝早10點，仔仔爸落o黎叫我哋起身，話個風已經走咗，可以返屋企喇，我哋食完Brunch就一家五口就執嘢返屋企，我奶奶就留係我小叔度，直至weekend至返唐人街

天師仔、Charco仔一番到屋企就自在晒，Charco仔仲返到屋企無耐，疴咗篤大便便o忝

我哋又即刻蒸雞胸肉同干貝俾兩隻仔定驚，之後，天師仔好快就好自在咁係我床張度瞓覺覺豬呢

呢次個颶風都唔算做成太大o既影響，但今次逃難一啲都唔好玩，只希望唔好有下次，亦都係度要多謝各位係facebook o既每位朋友對我哋一家o既關心