兩日一夜湊貓貓 — 上

呢篇唔係講阿姐啲Pet Sitter Job，係我都做咗兩日Pet Sitter，仲要係做義工，其實係幫我姑仔湊貓貓，記得阿姐有個讀獸醫嘅M 表妹嗎﹖讀咗4 年，再4 年，今年畢業喇，姑仔一家要去參加畢業典禮，因為間學校係Upstate 好遠，所以佢哋打算早一日去，但屋企4 隻貓貓又需要人湊，所以搵咗我呢個閒人幫手，仔仔爸再早一日去我姑仔公司度先攞鎖匙，呢日仔仔爸早收工就車我去姑仔屋企

一入屋就見到晒啲貓貓，仲有最怕人嗰隻Bubble，Bubble 一見我行上去就即刻走咗去匿埋

Nicole仔、Bobby仔都唔怕人

仲有Anna 都係唔怕人的

由其係Bobby 仔，仲好親人，會嚟討摸

畀啲乾糧佢哋食氹吓佢哋先

姑仔家門前有隻貓食客，佢經常嚟討食，就係呢位小朋友，不過我呢兩日都留意唔到佢出現，姑仔一直都想帶佢返屋企，只係佢實在太驚人，根本就埋唔到身，捉佢唔到

所以門前放咗開餐嘅位置畀佢，姑仔一早已經添咗糧水，因為之前落過雨，見個水碗啲水污糟晒，仔仔爸就去換過啲乾淨水，樓梯旁邊仲放咗個膠箱，裡面放晒乾草，畀佢做竇，不過唔知佢有無係裡面瞓覺

姑仔又寫定張時間表，教我幾時餵食，點樣照顧貓地

之後仔仔爸要走返屋企，因為都幾塞車，Nicole 仔唔怕人，但又唔黐我，唯有我去黐吓佢啦

Bobble 仔真係好鍾意人摸，佢一見我就碌晒地咁要我摸佢

Anna 就鍾意匿係呢度

Bubble 仲係好驚我

最後我唔理佢哋，係姑仔房開電腦煲韓劇，後來Bubble 嚟裝我，仲走入嚟床底匿埋，我用啲乾糧引佢出嚟

我send 條片畀仔仔爸睇，佢話我引蛇出洞，哈哈

有時Bobby 仔又嚟搵我討摸

Bubble 嚟催我放飯

個個都心急等食

Anna、Bobby 仔要我加少少乾糧至肯食，一定要睇住佢哋食，Anna 食得好快，佢會去搶Bubble 啲嘢嚟食

食飽飽的貓地，各自搵地方攤抖

間唔中，我又會畀少少乾糧佢哋食，因為姑仔家唔似我家咁放長糧，姑仔話佢哋一放乾糧就會猛咁食，食晒為止，會食到嘔，如果佢哋唔係屋企實餓親，所以一定需要有人幫手餵食

每次Bubble 都食唔晒就走，所以我要攞入房畀佢食埋佢，Anna 又想睇吓有無“死雞”執

俗語有話“有奶就是娘”，我餵過佢哋之後，Bubble 就唔再咁怕我，仲主動嚟搵我

Bobby 仔就成日入嚟討摸

摸完跳上窗前個箱頂望街

Bubble 入房嚟望住我

姑仔話Bubble 好鍾意梳毛

每晚11 點係佢哋食宵夜時間，要畀啲乾糧佢哋食

佢哋食完宵夜，Bubble 嚟陪我煲劇，之後我都要瞓覺了，Bubble 好乖， 仲成晚上床陪我瞓呢

待續…