大步檻過

再前一個星期，見天師仔突然無咩食慾，罐頭汁都只係食少少，乾糧完全唔食，忽然走番入房上床攤抖，至從Marble 仔走咗，都唔多見佢入房，依家仲會上床瞓

一係就匿係凳底

我要不停哄佢食嘢，但每次都只舔少少汁

 又間中噴血絲

因為佢食得少，佢其實好肚餓，朝早佢都有係度等開餐，畀平時啲罐頭佢又唔食，畀吱吱條又都只係肯食少少

之後嗰兩日完全都唔肯食嘢，成日匿凳底、床底，到夜晚都係喺凳底，但我覺得佢係成晚都無瞓，只係伏係凳底

又唔肯黐人，成日係凳底，怕我哋幫佢抺鼻抺面

見佢連口都流分泌物，我估佢應該係喉嚨有好多分泌物，佢好唔舒服，所以唔想食嘢

佢又無晒心機，唯有陪住佢，佢突然跳上窗台想望街，但又唔夠力跳唔上，我唯有抱佢上去，其實佢都已經好少望街

嗰陣我已經好心痛，覺得佢係咪將會離開我，所以我一直咁黐實佢、陪住佢，平時我係廳睇電視，用個舊書包引佢，佢就乖乖坐上書包陪我

但嗰兩日，佢成日係度戇居居，叫都唔睬，又唔願黐人，唔食嘢，又唔去瞓覺，又再瘦晒，唉

引佢唔到，反而引到Chewy

呢日見佢成晚都無食過嘢，唯有抽啲罐頭汁灌佢食

Stacy一直都好關心天師仔，我成日都會同佢講天師仔嘅近況，我同佢講佢唔肯食嘢，佢即刻走去買啲貓奶、湯包畀佢，叫我試吓畀佢食

啲貓奶佢就唔飲，不過襯開罐頭佢又肯食時，溝咗少少貓奶畀佢，佢都有食，後來開啲湯包畀佢，佢都有食

見佢肯食啲嘢，呢日我都不停咁畀佢少食多餐，不斷咁哄佢食吓嘢 

見佢肯食湯包，我又走去買多幾包，想買多幾款，但又無，佢要不停轉口味至肯食

佢已經好耐無主動去飲水，靠我平時加多啲水溝罐頭汁，至可以吸收多啲水份，呢兩日唔知點解，佢見我係浴缸攞水，佢就跳入浴缸想飲水，我又試吓佢係咪想飲，佢不單只想飲水，仲飲好多，但見佢突然飲咁多水，我又有啲驚，又唔敢畀太過多佢

以前天師仔鍾意食雞肉同雞汁，係至從Marble 仔走咗之後，就再無蒸雞畀佢，同Stacy 講咗佢唔食嘢，Stacy 提議話試吓整雞汁，我即刻落街去買雞胸肉，不過初時佢都唔飲，係再加咗啲吱吱肉泥，佢至肯飲

佢肯食返啲嘢，心情好啲，又肯黐番我，佢好難得咁瞓咗

佢一直都有小便，但佢已經幾日無大便，見佢係好想疴，見過佢出出入入砂盤想大便，但都大唔出，所以嗰晚見佢成晚瞓咗係砂盤入面

呢一日見佢肯主動食乾糧，不過都係食幾粒，呢晚佢又疴到大便，半夜同晨咁早，佢仲入房喵我攞嘢食

佢肯食番多啲，心情好啲，見佢咁瘦真係好肉赤

呢日佢開始上我張床度瞓，連夜晚都同我一齊瞓，佢又真係好耐無上我張床同過我瞓喇

呢兩日佢胃口已經好番晒，食完都仲未夠喉，要再添食，成日問我攞嘢食，唯有不停少食多餐

食完就上床瞓覺

呢個星期真係畀佢嚇死，幾驚佢係想離開我，好彩呢幾日佢大致上都算回復正常，總算係大步檻過，可能又見過阿姐、姑姐、表哥，知道好多人錫佢，佢仲未捨得離開，希望佢一直keep 住啦，我仲想陪佢耐啲呀