奇奇睇急症

係年幾兩年前，摸到奇哥個“格肋底”下面有粒嘢，當時都係細細粒，見摸粒嘢，奇哥好似唔覺痛，所以我哋都無理佢，近呢大半年，粒嘢越嚟越大粒

勞工節前見佢開始唔多願郁動，又唔多出去搵嘢食，成日攤抖，仲要餵佢至肯食

都覺得佢有啲唔妥，都打算預約帶佢去睇醫生，星期日見佢更加唔精神，隻右眼仲突然單咗，又撞正勞工節假期，唔想再拖，就帶佢去寵物醫院睇急症

其實平時奇奇食濕糧主要都係食啲汁，就算餵佢食佢都唔係食得多，而且見佢幾日都無大便

奇奇第一次坐車

醫生話佢有少少發燒，個肺有少少積水，隻眼可能係之前佢耳血腫有細菌影響，抽咗血無咁快有結果，醫生唔敢開退燒藥，驚影響佢個肝，只開咗啲開胃藥畀佢，“格肋底”下面粒嘢，唔肯定會唔會係癌症，要約時間抽組織再化驗

奇奇一返到屋企就主動去食乾糧

呢晚佢去爸爸張床度瞓

佢會去厠所，我又要留意佢有無大便

仔仔爸返工前又氹佢食乾糧同飲水，乾糧都唔係食好多

佢只鍾意食濕糧，我就多啲畀濕糧佢食，小食多餐

見佢主要都係食罐頭汁，我特登去買啲湯包返嚟畀佢食，佢又好鍾意食，見佢鍾意食湯包，即刻訂多幾盒畀佢

見佢有時走入浴缸度飲水，開頭會發陣吽哣至飲，開始唔多食乾糧

呢日見佢隻眼個朣孔開始唔識收縮

我開始係房陪住佢，除咗一定要出去，唔係我都留係屋企陪佢，就算出去都快快搞掂返屋企

每晚我臨瞓前，會畀湯包佢食咗至瞓

半夜我起床唔見佢，佢有幾晚自己走咗上廚櫃頂度瞓

見佢會飲好多水

佢食少咗，即刻瘦晒，真係好肉赤

見奇奇開始越食越少，見佢咁樣我個心真係好唔舒服，咁啱又睇緊一齣有少少傷感嘅韓劇

動物醫院做抽組織個appointment 仲有排都未到，決定帶佢去番自己間診所度做，佢仍然無大便，不過醫生話摸唔到個肚多糞便，因為佢只食流質，個肺有啲陰影，都無咩可以做，只有等抽組織結果

體重得番10 磅多啲

奇奇一入屋就自己去食乾糧，我真係好開心，雖然都唔係食咗好多，之後佢不停咁舔毛

仲唔記得收番條脷仔

又去飲水同尿尿

有時佢又鍾意去呢張貓抓板度抖吓，我好驚Mango仔咁重壓跌個櫃桶，壓親奇哥

仔仔爸一收工返嚟就會氹佢食嘢，啲乾糧佢好多時都只係會食幾粒，罐頭汁同湯包都開始只食小小

見佢心口有啲腫塊，唔知係咪擴散到個肺附近，覺得頂住，所以唔想食嘢，已經每日搽開胃藥都係食得少

除咗去小便飲水，佢都只係攤抖同瞓覺