搶嘢呀~

係“零食篇”中，其中一樣，我個衰仔又係好鍾意食o既，就係魷魚絲

但自從各位卜友都叫我唔好比佢食，所以之後都無再買，但當時個衰仔真係好鍾意食，成日自己走去抓出o黎，但佢見到脆卜卜又唔會咁嗰喎

睇吓佢偷食o既相，放心，佢出盡八寶都囉唔到

早幾日前，阿姐係“優之良品”買咗包魷魚片返o黎食，見唔見到佢對手仔

個衰仔一嗅到就發晒癲，一見到阿姐食，佢又要去阿姐度索，一收埋，佢又去抓，仲出口、手去搶

個衰仔真係好為食

三藩市之旅—唐人街

第二朝瞓飽至起身，諗住去唐人街搵嘢食，我哋住係Downtown o既酒店，由酒店行路去唐人街都係大約十分鐘

一去到就見到呢個牌坊

原本我哋想搵啲港式茶餐廳，原來呢度係無o既，後來我哋搵咗間餐館飲茶，呢間餐館外面仲搵人假扮皇帝、貴妃o黎吸引啲遊客，當時我心諗要皇帝、貴妃出o黎拉客，真係該煨囉，我哋唔係因為同情個皇帝、妃子而幫襯，而係我哋好肚餓，費事再去搵，飲茶之際，我心諗我住係紐約唐人街都好少去飲茶，o黎到呢度就搵茶飲，價錢比起紐約唐人街仲貴好多，好彩當日係瞓飽至去飲茶，嗰度啲餐館大部份無十點都唔開門

一入門口有呢張龍椅

睇呢間餅舖係咪仲好古老、好有懷舊feel

我哋o黎呢間餅舖買麵包，我哋其中一人問有無粟米飽，老闆娘答︰『粟米飽係老番飽，我哋只有唐人飽』，但我見到有牛角飽，同下面呢啲朱古力餅，呢啲咪係老番嘢囉，真係比佢吹漲

三藩市唐人街比我o既感覺係，佢哋仲一直保留傳統o既中國建築，好有中國feel，而紐約唐人街，有中國feel o既建築都拆得八八九九，又或者係重新番新，已經無晒係老番眼中，中國人神秘o既感覺，我覺得只係買唐人嘢o既唐人街

三藩市唐人街範圍都幾大，我哋每次o黎搵啲嘢食完，又要趕去其他景點，都無真真正正去行遍、睇清楚呢個唐人街，希望下次再有機會o黎可以好好咁行遍呢個唐人街

又寵壞

如果係由我開始出卜就開始睇o既朋友，應該會知道我個衰仔最鍾意食物嘢零食，唔知道o既話，可以睇番—仔仔—零食篇

個衰仔Charco至愛o既零食就係——乾瑤柱

我攞盒乾瑤柱出o黎影相，個衰仔一嗅到，就走o黎偷食，每粒都比佢舔過晒

通常仔仔爸每隔幾個月就整十粒、八粒放係雪櫃，每晚我哋食飽飯，睇電視時，就攞三份一粒出o黎餵佢食

近排仔仔爸寵壞佢，比個衰仔埋枱食

除咗乾瑤柱，有時係蟹柳

食得肉緊得滯，衰仔咬咗阿姐隻手指一啖o忝

比佢食慣咗，依家一開枱佢就坐係仔仔爸個位度等

仲趕都唔走

仲要上枱巡吓

咁您哋話吖，個衰仔係咪比仔仔爸寵壞

三藩市之旅—史丹福大學 & Google Headquarter

第一日去到三藩市，醫咗肚就去第一個景點--Stanford University史丹福大學

史丹福大學地方好大，又靚，感覺好舒服

樹上面有隻啄木鳥

著間條衫嗰位，就係我哋今次o既導遊，佢係我二姑奶個大仔，另一位就係佢老婆大人，其實佢兩個都係搬咗o黎三藩市一年左右，(原本佢哋住係波士頓)，但已經熟晒三藩市o既歷史，可能係呢一年o黎，都有好多朋友去探佢哋，又要帶朋友週圍去玩

呢個鐘樓會報時o架

連啲柱都好有特式

之 後就去第二個景點，Google總部，其實Google總部分好多個大樓，分佈唔同   o既地方，不過都係係附近，就係因為咁，導遊太太都唔記得係邊楝大樓，都兜來兜去至搵到，其實呢個唔係物嘢景點，只係之前阿導遊太太去過，順路又帶我哋去 睇睇，啲大樓無物嘢好睇，佢只係想帶我哋去睇佢呢個logo公仔，都幾cute

今次係咁多，三藩市之旅後篇，不日出版