近況

成個幾月都無出過Blog 了，因為之前個Backup Hard Drive 壞咗，所有啲相都儲晒係裡面，依家無晒，心情真係好差，所以都無心機出Blog，(再加上有啲懶😝)

連阿姐都投訴話我唔出Blog，又少send 貓地o既相比佢，佢無得睇貓地

我家五隻寶貝都好好喔

Charco 仔

天師仔

Marble 仔，仲係咁爛瞓

奇哥仔，都仲算好黐身

Chewy 仲係咁靚女

上個月係Charco 仔11 歲生日，無忘記，特登同佢慶祝，不過無特別買正嘢比佢食，只係佢可以獨享半條魚扒

係街見到舖頭貓，又比人摸，好開心呢

呢隻舖頭貓，見到佢時，佢眼甘甘咁望住喺馬路隻白鴿，真係好驚佢會撲出馬路

放咗工去完圖書館，行呢條路返屋企，有時都會遇到呢隻舖頭黑貓

今個冬天真係好漫長，踏入五月至正式回暖，見到週圍啲花都開晒，每一棵櫻花樹都開得好燦爛

除咗春暖花開o既日子，仲係貓地換毛o既季節，至從農曆新年後，公司只開五日，星期六有時瞓醒，我會自己走去食早餐，好鍾意食呢間小食店o既炒麵，好夠味，而且貪佢唔駛比小費

食完早餐返到屋企，就係大掃除o既時間，我會全屋掃清啲貓毛，仲會抺地

以下呢啲只係每日係屋企見到o既貓毛，其中一部份，因為貓地換毛o既關係，真係每日都見到週圍都係貓毛

唯有每日好勤力咁清啲貓毛

舅甥

Chewy 嚟咗呢個屋企，好彩啲舅父對呢位靚女都無咩點

Charco 仔、Marble仔、天師仔都唔會主動去理Chewy，但亦都唔介意佢黐得太近

 

 佢哋最friend 就係齊齊等開餐時

但其實佢都好倀雞，為咗食會郁手打啲舅父

 

講到最friend，Chewy 同奇舅父就最friend，可能兩個年紀都仲算細，又愛玩，所以兩個就夾得埋

只有奇奇至鍾意同佢一齊玩Laser Point

 

Chewy 會主動黐住奇舅父，連姿勢都好一致

又咀咀、又會舔毛，好sweet呢

佢哋都已經相處咗一年多，見到佢哋相親相愛當然好啦，其實只要佢哋相處融洽我都已經好滿足

冷落Marble 仔

至從奇哥仔愛黐住我之後，Marble 仔好似有啲唔開心，而且早排又湊Meow Meow，近排又湊Macy & Mittens，更加冷落咗Marble 仔

睇落好似無咩咁，依然鍾意瞓梳化

但每日食完罐罐就匿入浴缸

我放工返到屋企，奇哥仔又爭上大髀坐，佢又想嚟爭寵

得食完晚飯，追電視劇集時，佢先至有得黐吓我

佢想嚟黐我，但奇奇又係度，佢好唔鍾意

所以佢有時會去黐老豆，要老豆摸摸

佢見夜晚奇哥仔都黐住我瞓，佢就去老豆度瞓

湊Meow Meow 時，佢又去搵老豆瞓

我唔駛返工嘅日子，我成日都坐係電腦前，佢會嚟搵我，當我離開張櫈，佢就即刻坐上張櫈度，好似唔想我再次坐係電腦前唔理佢

成日走嚟扭我摸摸

我一唔理佢，再坐番上張櫈度，佢就…

湊兩粒孫前，難得Marble 仔有機會黐實我，陪我睇網劇

湊住兩粒孫時，佢又只可以陪老豆瞓

咁事實我又真係冷落咗佢，佢又為食，知佢鍾意食吞拿魚醬，我特登開一罐同佢分甘同味

佢已經食咗自己嗰份，仲要追入房再扭食

咁其實我又係衰嘅 ，轉咗呢份新工，時間比以前長咗，我一得閒就想用多啲電腦，因為連出Blog嘅時間都無，至從過咗農曆新年，公司因為生意差咗，改咗只返五日工，咁我至多咗一日時間用，可以陪吓貓地