契仔Shadow

話說兩個幾月前，我係唐人街撞番娟姐，我同娟姐講我已經帶咗天師仔返屋企養，佢聽到之後問我可唔可以帶埋Shadow返屋企養，(因為當初娟姐唔捨得 Shadow做街貓，所以帶咗Shadow返屋企暫養，等帶走咗Chocolate同佢啲貓b個老番婆，遲啲會帶埋Shadow走，其實個老番婆年紀都唔 細，佢早排又跌親，所以都唔可以帶Shadow走)

本身娟姐自己有一隻老貓，佢帶咗Shadow返屋企，一直都係兩隻貓隔離，因為兩隻貓曾經打交，老貓仲比Shadow咬傷，娟姐話佢依家屋企環境好差，都唔適合人同貓住，佢隻老貓都已經格硬交比朋友養住先，佢自己都好少返屋企瞓，但佢每日都會返屋企餵Shadow，所以佢希望我可以養埋Shadow，起碼會多啲人錫佢、陪住佢，仲會有貓陪佢玩，聽到之後，我當然想接埋Shadow返屋企 啦，但我當時都唔敢應承佢，我話要問過仔仔爸先，最後仔仔爸都係極力反對，話我奶奶一定會鬧

但最後我都無通知仔仔爸，就約娟姐帶咗 Shadow返屋企，當仔仔爸收工返o黎見到都鬧我，佢話叫我自己同佢阿媽講，後來我奶奶返到o黎，真係大發雷霆，仔仔爸一句都無出過聲，後來我奶奶仲嬲到離家出走，其實我見搞成咁，我都唔安樂，我奶奶仲星期一特登走返o黎，同我講清楚，話佢點都唔會比養呢隻貓，仲話要丟佢出街，仔仔爸又唔幫我，其實仔仔爸都話再無藉口留低Shadow，係無辨法之下，我唯有同奶奶講話送番隻貓比娟姐

娟姐一直都無帶Shadow去絶育，所以我哋帶咗Shadow去絶育

我只係比Shadow帶咗兩日燈罩，佢都好乖，都無嘜點舔傷口，兼且個傷口都好細，佢又好聽我話，叫佢唔准舔就唔舔

Shadow隻左腳以前受過傷，所以隻腳係曲唔到，行路仲係“拮吓、拮吓”

Shadow係一隻好嗲o既貓，佢會瞓係我身上，比我攬住瞓

呢張墊都係上次返香港貓友送o既，收咗係阿姐間房，比Shadow發現咗，就攞出o黎比佢墊，可能張墊係有貓草，隔住個袋佢都係咁high

咁做嘜Shadow又咁high呢

原來上次Charco仔、天師仔玩木天蓼時，支木天蓼攝咗係我房張床罅度

Shadow成日想出去玩，唔想困係阿姐間房

而天師仔又係成日係房門口，睇Shadow仔

通常我哋會困住Charco仔、天師仔係其他房至會比Shadow出廳行吓

佢入咗我房，瞓咗天師仔張墊墊

臨走，當然要同Shadow影番啲合照

Shadow仔係我屋企住咗13日，真係好唔捨得呀

Shadow曾經係我屋企住過三次，係咪註定佢同我有緣無份呢