幫貓沖涼

我姑爺仔見隻貓平時落雨落雪，佢個竇都會濕晒，見佢又咁黐佢，又唔捨得佢過寒冷冬天，所以佢決定帶隻貓貓返屋企

阿姑爺仔初初見佢時叫佢做“衰豬仔”，後來隻貓比佢摸肚仔，佢見到貓貓肚仔有乳頭，應該係女仔，所以改咗名叫佢做“Nicole”

因為呢個星期，我姑爺仔放大假，佢諗住襯呢個禮拜接佢返屋企，可以陪佢多啲，等佢快啲適應新環境

佢帶Nicole 返屋企要先同佢沖涼，但佢又驚自己搞唔掂，問我可唔可以先帶佢上o黎我度，想我哋幫佢沖涼，仔仔爸話無問題

其實上個星期五，阿姑爺仔已經想去捉佢，但貓地嗰日去咗玩，唔見貓，直至星期日下午，姑爺仔再去搵佢，初時都唔見貓

係附近搵咗一陣都唔見，最後佢返上車等，等咗幾分鐘，貓地終於出現，又用乾糧、濕糧引佢入籠，過程都算順利，姑爺仔即刻揸車o黎我屋企

一入屋就送入厠所等佢冷靜吓，天師仔同奇哥仔係厠所門口八卦呢

奇奇忍唔住走入去八

放佢出o黎，原來都幾大隻，仲大隻過Marble仔，仲好重手

仔仔爸先同佢剪咗指甲先，都好乖，都無太大掙扎

係沖涼時多啲掙扎，之後帶佢入房吹毛，幫佢滴埋蝨，餵埋杜蟲藥

之後佢匿係床頭條罅度，用零食氹佢，又係為食貓o黎，我請咗佢食零食之後，我叫佢，佢走埋o黎比我摸，佢真係又乖又親人

搞掂晒姑爺仔就帶佢返屋企，佢先放係Basement 做隔離，個Basement 係姑爺仔父母住的，先放係厠所

第二日

都幾好胃口，終於有大便了

尋晚姑爺仔話落Basement 瞓梳化陪佢，隻衰豬走上梳化同爸爸瞓呢，瞓醒仲幫爸爸“瑪沙處”，姑爺仔都不知幾開心

睇，尋日嘅相，佢瞓係梳化幾自在

好識得氹姻世伯、姻伯母，真係識Do

今日姑爺仔帶咗佢去檢查，原來佢係男仔o黎架，同我當年養Marble仔、奇哥仔時一樣擺晒烏龍，哈哈，其實我幫佢吹毛時，都發覺佢似係男仔多啲

其實我姑仔同佢哋對仔女都好反對我姑爺仔帶貓貓返屋企，佢哋驚貓貓會蝦Bubble 喎，咁Bubble 又有FIV，有驚佢哋會打交傳染喎，不過都帶咗返屋企啦，都係一家人，只要悉心照顧，就唔怕啦