成為一家人

其實由帶貓B 返嚟，我都無諗過養佢哋，我一心都係想幫佢哋搵好人家收養，初時阿姐個friend 想要黑貓，對黑糖有興趣，但見佢哋4 個咁close，希望佢揀多隻陪黑糖，而且黑糖又咁細膽，想多個brother 陪佢適應新家庭，但阿姐個friend 家中已經有兩隻貓，再多兩隻覺得負擔唔到，所以最後佢哋打退堂豉

之後我又託姑仔同阿姐個M 表妹幫手上網搵吓有無Shelter 可以收容佢哋，畀Shelter 幫佢哋搵家，後來搵到唐人街嗰間Shelter，話一有位可以接收佢哋，終於通知有位，話可以帶佢哋過去，原先我想自己帶佢哋過去，但姑仔話不如等仔仔爸放工車佢哋過去，唔駛我自己帶過去咁辛苦

之前一晚，難得見佢哋四隻咁齊貓，諗住可以影合照留記念

到咗呢朝，仔仔爸返咗工，我攞定個大貓籠出嚟，啲大貓就好奇八卦

我一直等仔仔爸電話通知，但仔仔爸一放工就直接返嚟屋企，話唔帶佢哋走，自己養，一直以嚟仔仔爸都無出過聲，我都估佢會唔捨得，又話驚芝麻醜樣無人要，黑糖似Charco 仔，想留低佢，又話留低兩隻，對花生、芝麻又唔公平，所以要留就四隻一齊留，而且話晒都已經養咗成個月有多，貓B 都習慣呢個屋企，尤其係黑糖，已經可以摸吓，無咁驚我哋，都唔想佢不停適應新環境

其實之前嗰日，我個心成日都好唔舒服，一來要送走佢哋又唔捨得，二來好似感覺到Charco 仔將要離開，嗰晚Charco 仔就走咗了，其實都要多得有佢哋，可以安撫吓Charco 仔走咗嘅痛 

可以睇住佢哋百百厭厭、玩到癲、搶住食、瞓著覺個可愛搞笑樣，都幾開心

再一次介紹四位新成員

黑糖 — 個性細膽，原先以為係女仔，因為唔敢強行捉住確認，近排至目測到係男仔一名

花生、黃糖 — 男仔，個性活潑，亦比較黐人

芝麻 — 女仔，個性都活潑，都愛摸摸，但唔黐人

其實我最想幫係貓B 媽媽，真係唔想睇住佢不停咁生貓B，不過仔仔爸已經轉咗新工，以後都再照顧唔到佢，唯有默默祝福佢啦

依家家有9 貓，真係好熱鬧，好彩啲貓哥哥姐姐都相處到，但啲貓哥哥姐姐就怕鬼咗佢哋，哈哈