除咗我愛錫我嗰幾隻契仔契女外，其實都仲有啲人鍾意佢哋，三樓個西班牙靚女啦，佢每日都攞糧水比佢哋，清潔阿姐 Mary，仲有一個係娟姐，佢又係好鍾意佢哋，佢一得閒就會過o黎睇佢哋，娟姐特別鍾意Shadow，佢覺得Shadow好乖，好嗲，隻腳又有事好可憐， 娟姐自己屋企有隻老貓，但係好惡死，會打其他啲貓，如果佢唔係有隻咁惡死o既貓，佢一定會帶Shadow返屋企養
我咪講過我每日放工，返到屋企樓下會搵佢哋，我會袋定啲零食，等佢哋坐係我大髀度食，同佢哋玩
2 月26日—嗰日放工一返到屋企樓下就見到Shadow係度，咁我就坐好，請佢食零食，咁啱嗰日娟姐day off過o黎睇佢哋，咁我一邊同Shadow玩，一邊同娟姐、Mary姐傾計，後來Chocolate就出現，我見到Chocolate就發現佢個肚細 咗，咁我就同娟姐講唔通佢生咗，咁我即刻去個貓竇度睇吓，發現佢真係生咗bb，不過就睇唔清楚有幾多隻，我估啲貓b應該係之前一晚生，我同娟姐、Mary 姐決定同佢再整過佢個貓竇，等佢有個乾淨o既環境餵貓b，但當時日光日白，唔想咁“揚”比人睇到，就約晚上一齊整，七點鐘約係我樓下等，娟姐係屋企攞咗個 大塑膠筒、舊枕頭、舊床單、毛巾、紙皮箱咁，整咗個又乾淨、又比較舒服o既竇比佢哋，個竇其實都係娟姐一手一腳整，我同Mary姐就間唔中幫吓手咁，我o 既任務係將啲貓b放返入新竇
當我係過舊竇攞貓b出o黎嗰陣，Chocolate都好緊張，仲想叼啲貓b走，咁我就快手快腳咁將啲貓b放入 新竇，一共係五隻，有黑、有隻係黑白，因為當時天黑都唔係睇得好清楚，根手我就想清理個舊貓竇，都係用相同o既塑膠筒做，裡面有幾件舊衫、舊褸，都幾凌 亂，又臭、又污髒，當我打算攞晒啲舊衫去掉o既時候，發現一隻已死o既貓b，係黑白貓
當我哋放新竇o既時候，Shadow一直係旁邊度睇住，我踎係地下，佢都仲想坐上我大髀度，真係比佢激C
出生八日
隻黑白貓個樣好儍呀，隻虎紋個樣好老積
出生十日
出生十一日，見到兩隻虎紋，後面有隻全黑
點解…點解佢哋可以咁得意，又好靚，好精靈呀
佢個貓竇收係啲樹叢貼住楝大厦邊，我係睇唔到個貓竇入面o既情況，以上o既相我都係伸部相機入去影，所以唔可以影晒咁多隻，我每日伸隻手入去個貓竇度摸吓
啲貓b check吓有無體溫，我驚佢哋會死係入面都唔知，呢個星期一，我特登拉個竇出啲，終於睇清楚啲貓b，連埋死咗嗰隻，係兩隻黑白色，兩隻虎紋，兩隻全黑
我啲契孫係咪好靚、又好可愛呢
沒有留言:
張貼留言